Milicyja: Fanat «Dynama» byŭ zatrymany za mat, a «Słava Ukrainie» kryčali 400 čałaviek na stadyjonie
Fanat minskaha «Dynama» byŭ zatrymany 11 krasavika ŭ Salihorsku za niecenzurnuju łajanku, a nie za słovy ŭ padtrymku Ukrainy.
Ab hetym BiełaPAN paviedamiŭ pres-sakratar UUS Minskaha abłvykankama Alaksandr Danilčanka. Tak jon prakamientavaŭ paviedamleńnie na sajcie belultras.by.
Pavodle infarmacyi partała, 11 krasavika ŭ Salihorsku padčas futbolnaha matča «Šachcior» (Salihorsk) — «Dynama» (Minsk) u siaredzinie pieršaha tajma ŭ siektary fanataŭ minskaha kłuba pačałasia pieraklička «Słava Ukrainie, hierojam słava». Da siektara byli ściahnutyja dadatkovyja siły AMAPa, a paśla matča milicejski śpiecnaz zatrymaŭ adnaho z tych, chto pačaŭ pierakličku.
Za jaho zastupilisia dvoje fanataŭ «Dynama», jakich taksama zatrymali i dastavili ŭ milicyju. U dačynieńni da ŭsich troch byli składzieny administracyjnyja pratakoły za chulihanstva i supraciŭleńnie pry zatrymańni. «Čałavieku, jaki zaražaŭ pierakličku «Słava Ukrainie, hierojam słava», dali troje sutak i 3,5 miljona štrafu. Astatnim udzielnikam incydentu pahražajuć štrafy nie mienš čym 3 miljony», — havorycca ŭ paviedamleńni na sajcie belultras.by.
Pres-sakratar UUS Minabłvykankama Alaksandr Danilčanka paćvierdziŭ, što incydent mieŭ miesca, ale jaho traktoŭka fanatami nie adpaviadaje rečaisnaści. Pavodle jaho słoŭ, pačynaŭ pierakličku nie adzin balelščyk, a niekalki, a skandavali jaje čałaviek 400.
«Kali b pravaparušeńnie zaklučałasia ŭ hetym, što, nieabchodna było zatrymlivać niekalki socień balelščykaŭ?» — ździŭleny pradstaŭnik UUS.
Pavodle jaho infarmacyi, adzin z najbolš aktyŭnych fanataŭ byŭ zatrymany na vychadzie sa stadyjona za hučnuju niecenzurnuju łajanku, pry hetym akazaŭ supraciŭleńnie.
Za jaho zastupilisia dvoje balelščykaŭ, tamu i jany byli dastaŭleny ŭ milicyju. U dačynieńni da ŭsich troch skłali pratakoły ab administracyjnych pravaparušeńniach pa art. 17.1 (drobnaje chulihanstva) i 23.4 (niepadparadkavańnie zakonnamu rasparadžeńniu abo patrabavańniu słužbovaj asoby pry vykanańni joju słužbovych paŭnamoctvaŭ) KoAP. Dvoje «zastupnikaŭ» zhadzilisia z abvinavačańniami i byli adpuščanyja. Toj, za kaho zastupalisia, — nie. Jaho zatrymali, pamiaścili ŭ IČU, dzie jon da 14 krasavika čakaŭ suda. Pa rašeńni suda Salihorskaha rajona małady čałaviek byŭ aštrafavany na 22 bazavyja vieličyni.