Minharvykankam nie dazvoliŭ pravieści Čarnobylski šlach u Kurapaty
Minharvykankam dazvoliŭ praviadzieńnie 26 krasavika akcyi «Čarnobylskt šlach», ale źmianiŭ farmat akcyi.
Taćciana Novikava, Alaksiej Janukievič, Dzianis Sadoŭski, Illa Dabratvor
Raniej zajaŭniki prasili dazvoli na praviadzieńnie akcyi pa maršrucie: kinateatr «Kastryčnik» (st. mietro «Akademija navuk») — vuł. Chmialnickaha — Ja. Kołasa — Łahojski trakt — uročyšča Kurapaty z 12:00 da 15:00.
Harvykankam dazvoliŭ praviadzieńnie «Čarnobylskaha šlachu» ŭ zvykłym apošnim časam farmacie: zbor udzielnikaŭ z 16.00 da 16.30 kala kinateatra «Kastryčnik», šeście pa praśpiekcie Niezaležnaści i vulicy Surhanava da parku Družby Narodaŭ, praviadzieńnie ŭ parku mitynhu z 17.30 da 18.30.
Da taho ž pieršapačatkovy zajaŭnik na arhanizacyju «Čarnobylskaha šlachu» Illa Dabratvor paviedamiŭ, što jaho vyklučyli sa śpisu arhanizataraŭ. Dabratvor patłumačyŭ svajo vyklučeńnie ź liku zajaŭnikaŭ nastupnym čynam:
«U Minharvykankamie spasłalisia na toje, što 24.03.2014 byŭ pryciahnuty da administracyjnaj adkaznaści. Adnak ja chaču zajavić, što ŭ hety dzień ja śviatkavaŭ dzień naradžeńnia, i navat nie viedaju, ci treba padavać zajavu ab masavym mierapryjemstvie na śviatkavańnie ŭłasnaha dnia naradžeńnia».
Pa słovach kiraŭnika Partyi BNF Alaksieja Janukieviča, admova ŭ praviadzieńni akcyi ŭ zajaŭlenym farmacie (šeście da Kurapataŭ) u harvykankamie patłumačyli tym, što pa abranym maršrucie znachodziacca administratyŭnyja budynki, praviadzieńnie masavych akcyj kala jakich zabaroniena zakonam. Rašeńnie Minharvykankama pryniata z ulikam pazicyi Minskaha rajvykankama. Taksama Janukievič patłumačyŭ, što Minharvykankam nie dazvoliŭ pravieści mierapryjemstva raniej, bo ŭ Parku družby narodaŭ na raniejšy čas zapłanavana aficyjnaje mierapryjemstva.
«Taksama čynoŭniki paviedamili, što paśla praviadzieńnia šeścia na Dzień voli ad minčukoŭ pastupili skarhi na vykarystańnie partretaŭ ukraincaŭ, da jakich u hramadstvie isnuje nieadnaznačnaje staŭleńnie,
i paprasili arhanizataram «Čarnobylskaha šlachu» i budučym arhanizataram mitynhaŭ na Dzień voli pryniać toje da viedama. Adnak nas ciešyć, što vykarystańnie partretaŭ takich biełarusaŭ jak Vituška i Bułak-Bałachoviča nie vyklikała pratestu. Vidać, u biełaruskim hramadstvie nakont hetych hierojaŭ isnuje kansensus i zhoda, i ja liču što ŭžo heta jość niakiepskim vynikam», — skazaŭ jon.
Finalnaj kropkaj šeścia, pavodle arhanizataraŭ, musić stać čarnobylskaja kaplica, kudy paśla zakančeńnia mitynhŭ ŭ indyvidualnym paradku ŭsich žadajučych zaprosiać arhanizatary.
Alaksiej Janukievič i pres-sakratar BCHD Dzianis Sadoŭski vykazali pratest suprać źmianieńnia pieršapačatkova zajaŭlenaha maršruta šeścia.
«Adnak «Čarnobylski šlach» pierš za ŭsio akcyja pamiaci, «Čarnobylski šlach» nie miesca dla sutyčak z AMAP — dla hetaha jość inšyja mierapryjemstvy, padčas jakich treba prajavić žorstuju pazicyju. U źviazku z hetym my pahadzidlisia na ŭmovy Minharvykankama», — dadaŭ Sadoŭski.
Taćciana Novikava z arhanizacyi «Ekadom» paviedamiła, što ad siabie padała zajaŭku na praviadzieńnie mitynhu «Za biaźjadzierny śviet» 26 krasavika ŭ Parku družby narodaŭ z 18:00 da 20:00, kab pieršy mitynh «płaŭna pieraciok u druhi».
«Akramia mitynhu my arhanizujem dyskusiju «Ekałahičnyja nastupstvy jadziernych katastrof», jakaja adbudziecca ŭ halerei «Ŭ» 22 krasavika z 18:30 da 21:00.
U dyskusii voźmie ŭdzieł viadomy brytanski daśledčyk Krys Baśbi i Juryj Varoniežcaŭ — biełaruski navukoŭca, były adkazny sakratar dziaržaŭnaj kamisii Viarchoŭnaha savieta SSSR pa rasśledavańni pryčyn katastrofy na Čarnobylskaj AES», — skazała Novikava.
Hałoŭnym ideałahičnym pasłańniem hetaha hoda na «Čarnobylskim šlachu», jaki nieadnarazova padkreślili ŭsie arhanizatary akcyi, stanie pratest suprać rasijskaj jadziernaj ekspansii ŭ Biełaruś: jak u vyhladzie budaŭnictva AES u Astraŭcy, što prachodzić pa «ekśpierymientalnym» prajekcie i z šmatlikimi parušeńniami, tak i ŭ vyhladzie mahčymaha raźmiaščeńnia taktyčnaj jadziernaj zbroi na rasijskich źniščalnikach, dysłakavanych na biełaruskich avijabazach.