Łukašenka — Pucinu: My vielmi cenim vaš pryjezd u hetyja śviatočnyja dni
«Našy sumiesnyja namahańni pa intehracyi ŭ ekanamičnaj śfiery, biezumoŭna, prynosiać i pryniasuć svoj plon u jašče bolšym pamiery, i my nie tolki pavialičym abjomy našaj ekanomiki, ale i jaje jakaść», — zajaviŭ prezident Rasii Uładzimir Pucin 2 lipienia na sustrečy ŭ Minsku z Alaksandram Łukašenkam.
Fota BiełTA.
Pavodle jaho słoŭ, zusim chutka pačnie dziejničać Jeŭrazijski ekanamičny sajuz. «Biez usiakaha sumnieńnia, heta budzie jašče adnym krokam napierad u abjadnańni namahańniaŭ našych narodaŭ, našych dziaržaŭ na bazie ŭsiaho taho stanoŭčaha, što dastałasia nam z raniejšych časoŭ i što było zroblena rukami i palita, prama skažam, kryvioju, kali mieć na ŭvazie vajenny čas, našych prodkaŭ, baćkoŭ i dziadoŭ», — cytuje rasijskaha prezidenta dziaržaŭnaje infarmahienctva BiełTA.
Jon pavinšavaŭ biełarusaŭ z 70-hodździem vyzvaleńnia Biełarusi ad niamiecka-fašysckich zachopnikaŭ:
«My ŭžo siońnia ŭspaminali pra tyja nievierahodnyja achviary, jakija prynios na ałtar pieramohi biełaruski narod, jak šmat było zroblena paśla Vialikaj Ajčynnaj vajny dla adnaŭleńnia respubliki i takoha śvietłaha, pryhožaha horada Minska».
Łukašenka nazvaŭ pryjezd Pucina ŭ Biełaruś u śviatočnyja dla krainy dni simvaličnym.
«Heta simvalizuje naša adzinstva, havoryć pra toje, što my jak byli tady razam, tak i zaŭsiody budziem razam, — skazaŭ jon. — My vielmi cenim vaš pryjezd u hetyja śviatočnyja dni. Niachaj i ciažkija byli časy, ale ŭsio-taki pieramoha paśla ŭsich ciažkaściaŭ była žadanaja i ahulnaja».
«Jak ja niejak užo skazaŭ, kali mianie tut dapiakali asobnyja ludzi: nie chvalujciesia, kali treba, my staniem śpinaj da śpiny i budziem abaraniacca, my budziem zmahacca, jak niekali zmahalisia razam», — zaznačyŭ Łukašenka.
Jon vykazaŭ udziačnaść Pucinu za pryjezd, a taksama za dapamohu i padtrymku, što akazvajucca krainie i ekanomicy: «My heta pamiatajem, i paviercie, što pacichieńku i Rasija, i Biełaruś z suśvietnaha kryzisu vykaraskavajucca. My ŭstaniem na nohi i, upeŭnieny, ekanamična budziem jašče macniejšyja».