Haračynia da 30—35 hradusaŭ zatrymajecca ŭ Biełarusi na tydzień
Nad Niomanam, fota Todara Vajciuškieviča
Pra heta paviedamiła hałoŭny sinoptyk Respublikanskaha hidramieteacentra Ludmiła Paraščuk.
«Zhodna z klimatyčnym analizam letniaha siezona, «makaŭka leta» ŭ Biełarusi zvyčajna prypadaje na kaniec lipienia — pačatak žniŭnia.
Usie ekstremalnyja značeńni leta naziralisia mienavita ŭ hety pieryjad», — skazała Ludmiła Paraščuk.
Samy haračy lipieński dzień byŭ zarehistravany 30-ha 1936 hoda ŭ Homieli, kali tempieratura pavietra dasiahnuła plus 37,9 hradusa, samy haračy dzień žniŭnia z tempieraturaj u razhar dnia 38,9 hradusa byŭ adznačany ŭ hetym ža horadzie 8-ha čysła 2010 hoda.
Pavodle słoŭ hałoŭnaha sinoptyka, hetym letam nadvorje pradkazalnaje. Jak i čakałasia, samyja haračyja dni prypali mienavita na druhuju pałovu lipienia — pieršyja daty žniŭnia. «Hałoŭnaj pryčynaj takoj sinaptyčnaj situacyi staŭ šyroki ciopły skandynaŭski antycykłon, jaki, pieramiaściŭšysia na terytoryju Pavołža, pakinuŭ Biełaruś na svajoj zachodniaj častcy. I ciapier razam z paŭdniovymi patokami ŭ krainu pastupaje trapičnaje pavietra», — raskazała Ludmiła Paraščuk. Va ŭmovach nievialikaj vobłačnaści i ŭsio jašče vialikaj praciahłaści śvietłavoha dnia pavietra dobra prahravajecca.
Da kanca lipienia ŭ mnohich rajonach Biełarusi dzionnaja tempieratura pavietra čakajecca ŭ miežach plus 30-35 hradusaŭ. Nie tak horača budzie tolki nočču.
Tak, za haradskoj miažoj prahnazujecca ad 14 da 16 hradusaŭ ciapła. U vialikich haradach pavietra budzie astyvać da 17-21 hradusa sa znakam plus.
Pad achovaj vobłaści pavyšanaha atmaśfiernaha cisku ŭ asnoŭnym budzie biez apadkaŭ. «Daždžy buduć prachodzić tolki miescami. Taki tempieraturny fon na 5-9 hradusaŭ pieravysić klimatyčnuju normu», - dadała Ludmiła Paraščuk.
Žnivień startuje taksama haračym nadvorjem.
U piatnicu tempieratura pavietra nočču składzie plus 16-22 hradusy, dniom pavietra prahrejecca ad 30 da 35 hradusaŭ, pa paŭnočnym zachadzie, dzie čakajecca bolš vobłačnaści, prahnazujecca 27-29 hradusaŭ sa znakam plus. Miescami pa paŭnočnym zachadzie respubliki projduć karotkačasovyja daždžy, prahrymiać navalnicy.
U vychadnyja tempieratura pavietra nočču składzie plus 16-22 hradusy, u dzionnyja hadziny pavietra prahrejecca da 30-35 hradusaŭ ciapła. U asobnych rajonach projduć karotkačasovyja daždžy, mahčymy navalnicy.
Pavodle papiaredniaha prahnozu, istotnaha źmianieńnia ŭ raźvićci atmaśfiernych pracesaŭ nie pradbačycca i ŭ nastupnyja dni.
«Čakanaje nadvorje nielha nazvać rekordna haračym. Ale kali ŭličyć, što haračaje nadvorje pradoŭžycca, prynamsi, dva tydni, nieabchodna pamiatać ab elemientarnych praviłach pavodzin u takich umovach, u tym liku staracca čaściej znachodzicca ŭ ciani, pić bolš vadkaści», - papiaredziła Ludmiła Paraščuk.
U suviazi z haračym i ŭ asnoŭnym suchim nadvorjem u lasach Biełarusi rezka pavialičvajecca pažaraniebiaśpiečnaść. «Nie zabyvajcie ab hetym, adpraŭlajučysia ŭ les, i budźcie vielmi aściarožnyja z ahniom», - dadała śpiecyjalist hidramieteacentra.