Anłajn-rekłama ŭzdymaje pytańni abarony Brytanii
Zbroja budučyni Northrop Grumman - marski bajavy bieśpiłotny samalot Northrop Grumman X-47B na borcie avijanosca «Džordž Ch.V. Buš»
Vykanaŭčy dyrektar jeŭrapiejskaha adździaleńnia hihanta abaronnaha siektara kampanii Northrop Grumman Endriu Tajler vyrašyŭ niezvyčajnym sposabam aktyvizavać dyskusiju adnosna budučyni armii i fłota Vialikabrytanii — jon nabyŭ rekłamnuju prastoru na sajtie hałoŭnaj biznes-hazety krainy Financial Times.
U hetym hodzie na samych vysokich uzroŭniach Brytanija budzie pierahladać svaju stratehiju ŭ sfery abarony i biaśpieki. Heta siarod inšaha paŭpłyvaje i na budučyja dziaržaŭnyja zamovy zbroi, piša defensenews.com, tamu kampanija Tajlera zusim nie całkam altruistyčnaja.
Northrop Grumman — bujnaja amierykanskaja abaronna-pramysłovaja karparacyja, vyručka jakoj u 2013 hodzie skłała $24,7 młrd, a kolkaść supracoŭnikaŭ nabližajecca da 70.000 čałaviek.
Tajler, były kiraŭnik upraŭleńnia łondanskaha ministerstva abarony pa zakupkach techniki, zadaje aŭdytoryi ŭ svaich anłajn-zvarotach roznyja pytańni — ci musić Brytanija zastavacca pieršakłasnaj vajennaj dziaržavaj, jak jana musić arhanizoŭvać svaju abaronu ŭ kiber-prastory i ci varta nabyvać stełs-źniščalniki F-35.
«Siarod hetych pytańniaŭ: jak siońniašnija pahrozy dziejničajuć na biaśpieku i dabrabyt Brytanii, nakolki my razhladajem siabie jak častku suśvietnych sił padtrymańnia paradku, u jakich umovach nam prydziecca vajavać adnym?», - kaža Tajler.
Apošniaje pytańnie, mahčyma, spravakavanaje ahresijaj Rasii suprać Ukrainy, paŭstaje i pierad mnohimi inšymi krainami Eŭropy, navat siabrami NATA, jakija mohuć zastacca sam na sam z ahresaram, kali amerykanskija vajennyja siły mohuć być skavanyja kanfliktami ŭ inšych častkach śvietu.