U Mahilovie prachodzić sud nad palitviaźniem Mikałajem Dziadkom, jakoha mielisia vypuścić na volu 3 sakavika
U mahiloŭskaj turmie № 4 25 lutaha prachodzić sud nad palitviaźniem Mikałajem Dziadkom. Sudovy razhlad prachodzić u zakrytym režymie.
Jak paviedamiła žurnalistam žonka Mikałaja Dziadka Valeryja Chocina, jaje mužu inkryminujecca złosnaje parušeńnie režymu (artykuł 411 Kryminalnaha kodeksa). Rodnyja miarkujuć, što Dziadok zastaniecca za kratami jašče na adzin hod. Valeryja Chocina ličyć, što ŭłady apasajucca vypuskać na volu Dziadka, u jakoha termin źniavoleńnia chutka zakančvajecca, u hod prezidenckich vybaraŭ. Razam z tym jana ličyć, što ŭłady prosta pierastrachoŭvajucca, bo ŭ ruchu anarchistaŭ «niama jarka vyjaŭlenaha lidara, za jakim mahli b pajści ludzi».
Dziadku inkryminujuć bolš za 20 parušeńniaŭ režymu ŭ miescach źniavoleńnia, asnoŭnym ź jakich źjaŭlajecca našeńnie zamiest turemnaj roby spartyŭnaha kaściuma. Usie parušeńni byli sabranyja z momantu jaho źniavoleńnia ŭ 2012 hodzie.
Pavodle słoŭ žonki, pa ŭsioj vierahodnaści, paśla suda Dziadka etapujuć z mahiloŭskaj turmy ŭ niejkuju inšuju papraŭčuju ŭstanovu.
Na sudzie prysutničaje tolki advakat. Rodnych i blizkich tudy taksama nie puścili.
Dziadok byŭ uziaty pad vartu 3 vieraśnia 2010 hoda. 27 maja 2011 hoda sud Zavodskaha rajona Minska pryhavaryŭ jaho da čatyroch z pałovaj hadoŭ źniavoleńnia ŭ kałonii strohaha režymu na padstavie č. 2 art. 339 KK (złosnaje chulihanstva). 5 śniežnia 2012 hoda pastanovaj suda ŭmovy adbyvańnia pakarańnia Dziadku byli zamienienyja na bolš žorstkija, i Mikałaja pieraviali z kałonii № 17 Škłova ŭ turmu № 4 Mahilova.
Jak ličać pravaabaroncy, padstavaj dla prysudu Dziadku staŭ jaho ŭdzieł u mirnaj demanstracyi pratestu kala Ministerstva abarony suprać sumiesnych ruska-biełaruskich vajennych vučeńniaŭ.
Dziadok pavinien byŭ vyjści na volu 3 sakavika 2015 hoda ŭ suviazi z zakančeńniem terminu źniavoleńnia.