Ekśpierty: Biełaruskaj ekanomicy pahražaje «vir biednaści»
«Nacyjanalnaja ekanomika pahruziłasia ŭ asiarodździe nizkaha rostu i dla jaje akreśliłasia pahroza traplańnia ŭ «vir biednaści», — ličać ekśpierty Biełaruskaha ekanamičnaha daśledča-adukacyjnaha centra (BEROC), vysnovy jakich pryvodziacca ŭ padrychtavanym makraekanamičnym ahladzie za 2014 hod.
Na dumku ekanamistaŭ, kryzis na valutnym rynku na miažy 2014—2015 hadoŭ staŭ «vynikam stratehičnych słabaściaŭ nacyjanalnaj ekanomiki i praźmiernaj prychilnaści palitycy tarhietavańnia abmiennaha kursu».
Aŭtary ahladu ličać 2014 hod «čarhovym zhublenym hodam dla biełaruskaj ekanomiki». Peŭny pazityŭ minułaha hoda «možna ŭbačyć tolki ŭ tym, što ekanamičnyja ŭłady de-fakta pryznali niepaźbiežnaść praviadzieńnia strukturnych reform i stali zajaŭlać ab praviadzieńni padrychtoŭčaha etapu da takich reform».
Razam z tym aŭtary źviartajuć uvahu, što biełaruskija ŭłady vykazvajuć «niaśpiešnaść u realizacyi mier strukturnaha refarmavańnia» ekanomiki.
«Niefarmalna čynoŭniki stali kłasifikavać 2014—2015 hh. u jakaści padrychtoŭčaha pieryjadu dla praviadzieńnia sistemnych strukturnych reform, anansujučy ich pačatak u 2016 hodzie sinchronna z novym vybarčym cykłam», — havorycca ŭ makraekanamičnym ahladzie BEROC.
Nahadajem, u apošnija hady ŭ Biełarusi naziralisia nizkija tempy rostu VUP (u 2012-m — 1,7%, u 2013-m — 1%, u 2014-m — 1,6%), i na hetym fonie mižnarodnyja finansavyja arhanizacyi stali rekamiendavać biełaruskim uładam pravieści strukturnyja reformy z metaj pavyšeńnia ekanamičnaha patencyjału krainy. Na dumku mižnarodnych ekśpiertaŭ, adsutnaść reform budzie pryvodzić da stahnacyi dachodaŭ nasielnictva.
U kancy krasavika 2015 hoda kiraŭnik pradstaŭnictva Suśvietnaha banka Jan Čuł Kim, adkazvajučy na pres-kanfierencyi na pytańni BiełaPAN, zajaviŭ, što bank dapamahaje ŭradu Biełarusi padrychtavać «darožnuju kartu» pa strukturnym refarmavańni ekanomiki.
Papiaredni varyjant «darožnaj karty» razhladaŭsia ŭ siaredzinie krasavika na viasnovaj siesii Mižnarodnaha valutnaha fondu i Suśvietnaha banka ŭ Vašynhtonie. Nahadajem, viasnoj 2015 hoda biełaruskija ŭłady vykazali zacikaŭlenaść u zaklučeńni novaj kredytnaj prahramy z MVF. Pradstaŭniki MVF, u svaju čarhu, zajavili, što novaja prahrama mahčymaja ŭ vypadku hatoŭnaści biełaruskich uładaŭ pajści na hłybokija strukturnyja reformy ŭ ekanomicy.