Lavon Volski: Nie čapajcie Smołavaj!
Šanoŭnaje spadarstva!
Ja chaču źviarnucca da čalcoŭ hramadzkaj inicyjatyvy, jakija składajuć śpisy “nieŭjaznych” u Eŭropu.
Mnie małaznajomyja proźviščy šmat kaho z hetaje “nieŭjaznoje” kampanii. Ja nikoli ź imi nie kantaktavaŭ, i nia vielmi chočacca. Chacia siarod ich, napeŭna ž, jość tajamničyja “bajcy niabačnaha frontu”, jakija paŭpłyvali na ciapierašniuju sytuacyju z kancertami niezaležnych muzykaŭ u našaj krainie.
Dyk voś. Nie paŭtarajcie čužych pamyłak. Nie kranajcie, kali łaska, tavaryšaŭ Smołavu, Jarmolenku i inšych aficyjnych śpievakoŭ. Nu, śpiavali (zrešty, nie śpiavali, usio było pad fanahramu) jany na ahitacyjnych kancertach, nu, davali interviju pra addanaść uładzie… A što im było rabić? Hetyja ludzi – na dziaržsłužbie. Jany pracujuć u teatrach estrady, dziaržaŭnych arkiestrach, inšych niejkich ustanovach. Admovicca ad kancertu – značycca, padpisać sabie jak artystu vyrok tut, u Biełarusi. Ź miajcovaje zorki ty robiśsia čornaj dzirkaj. Ci žoŭtym karlikam. A dzie im jašče pracavać? U jakoj krainie? Tolki tut jość šaniec.
Nie kranajcie ich. Nu, artysty, nu, prydvornyja, chto ž kranaje artystaŭ! Kranajcie idejolahaŭ, načalnikaŭ… U našych estradnikaŭ paprostu nie było vybaru. Voś raptam usio źmienicca, i ŭ ich znoŭ nia budzie vybaru – jany buduć na baku dziaržavy, jakoj by jana ni była. Heta specyfika raboty.
Tamu ja prašu Vas adklikać proźviščy śpievakoŭ i śpiavačak z Vašaha “nieŭjaznoha” śpisu. Udzieł u ahitacyjnych kancertach - heta nie złačynstva, heta ichnaja biada. Jany prymusili siabie pavieryć (nia ŭsie, naturalna, lepšyja, najbolš talenavityja j ščyryja ź ich, astatnija paprostu cynična zajmajucca karjeraj) što pracujuć u imia lepšaje budučyni, miru, stabilnaści i dabrabytu narodu, za Biełaruś. Tolki što heta za Biełaruś – bieź biełaruskaje movy, z historyjaj, što pačynajecca z Druhoj Suśvietnaj vajny, biaz Bykava i Baradulina… Zrešty, heta im nie rastłumačyš, nia varta j pačynać.
Jašče raz prašu, šanoŭnaje spadarstva, tyja, chto składaje śpisy “nieŭjaznych” ludziej: nie prypadabniajciesia dziaržaŭnym idejolaham, jakija ŭ adzin momant “razabralisia” z ajčynnaj niezaležnaj muzykaj! Našyja pap-vykanaŭcy – jak spartoŭcy, jak žaŭniery – što im zahadajuć, toje i zrobiać, toje i skažuć. Nia varta karać žaŭnieraŭ, karajcie aficeraŭ i hienerałaŭ.
Kali Vas nie pierakanała ŭsio vyšejskazanaje, skažam hetak: Śviet nia viedaje ničoha pra našych “majstroŭ estrady”. Paśla Vašych zabaronaŭ daviedajecca. Vam heta treba?