Hienprakuratura pierachodzić na biełaruskuju
Hienprakuratura padtrymała zvarot staršyni TBM ab afarmleńni aficyjnaha kanverta hetaj dziaržstruktury pa‑biełarusku.
Ryhor Vasilevič |
Pra heta havorycca ŭ liście hienprakurora Ryhora Vasileviča, jaki pastupiŭ u štab‑kvateru TBM.
U intervju BiełaPAN A.Trusaŭ vykazaŭ padziaku R.Vasileviču za razumieńnie moŭnaj prablemy ŭ dziaržavie, jakaja dekłaravała parytet dźviuch dziaržaŭnych moŭ — biełaruskaj i ruskaj. «Adnak paśla 1996 hoda hałoŭnaj stała mova susiedniaj dziaržavy, a biełaruskaja mova ź dziaržaŭnaj pieratvaryłasia ŭ srodak znosinaŭ nievialikaj častki nasielnictva, jakoje nie pradstaŭlaje dziaržaŭny aparat. U suviazi z uźnikłaj situacyjaj TBM pravodzić palityku pa dasiahnieńni parytetu biełaruskaj i ruskaj moŭ na błankach i ŭ tekstach dziaržaŭnaj dakumientacyi», — zaznačyŭ A.Trusaŭ.
U jakaści stanoŭčaj reakcyi čynoŭnikaŭ na takuju palityku staršynia TBM pryvioŭ rašeńni Centralnaj kamisii pa vybarach i praviadzieńni respublikanskich refierendumaŭ i Minskaha harvykankama ab padrychtoŭcy mnohich uzoraŭ svajoj dakumientacyi na movie tytulnaj nacyi. «Akramia taho, Kanstytucyjny sud i Nacyjanalny bank taksama vydajuć svaju aficyjnuju dakumientacyju na biełaruskaj movie», — skazaŭ A.Trusaŭ.
Siarod dziaržstruktur, jakija «nijak nie reahujuć» na zvaroty TBM, jon nazvaŭ Ministerstva justycyi i RUP «Minsk Kryštal» pa vypusku likiora‑harełačnych vyrabaŭ. Pavodle słoŭ A.Trusava, čynoŭniki hetych struktur nie razumiejuć, što niama drobiaziej u takoj važnaj spravie, jak pašyreńnie śfiery ŭžyvańnia rodnaj movy. «I kali na aficyjnych kanviertach Miniusta i harełačnych etykietkach staličnaha «Kryštalu» ŭ asnoŭnym prysutničaje tolki ruskaja mova, heta śviedčyć ab staŭleńni da nacyjanalnaj duchoŭnaj spadčyny», — zajaviŭ staršynia TBM.