Pierastaralisia: u Hrodnie achoŭniki načnoha kłuba źbili naviedvalnika da paŭśmierci
Jak paviedamlaje pres-słužba UUS Hrodzienskaha abłvykankama, incydent adbyŭsia ŭnačy ŭ adnoj z zabaŭlalnych ustanoŭ horada.
«Małady čałaviek adpačyvaŭ z kampanijaj. Jany dobra vypili i ŭ chłopca zakipieła kroŭ. Pavodle słoŭ achoŭnikaŭ ŭstanovy, chłopiec staŭ pavodzić siabie nachabna, z vyklikam, parušaŭ paradak, čaplaŭsia da tancorki. Achoŭniki kłuba sprabavali supakoić čałavieka, adnak toj nie chacieŭ padparadkoŭvacca patrabavańniam i adbyłasia bojka. Naviedvalnik udaryŭ u tvar achoŭnika. Hety faktar i pryvioŭ da sumnych nastupstvaŭ», — havorycca ŭ paviedamleńni.
U vyniku chłopiec apynuŭsia la vychadu z kłuba na ziamli biez prytomnaści. Jak zafiksavali miedekśpierty paciarpiełamu pryčynieny ciažkija cialesnyja paškodžańni ŭ vyhladzie zakrytaj čerapna-mazhavoj traŭmy, strasieńnia mozhu, zakrytaha pierałomu skronievaj kostki, krovapadcioku i drapin na hałavie, tupoj traŭmy levaha voka siaredniaj stupieni i inšyja paškodžańni.
U dačynieńni da achoŭnikaŭ zabaŭlalnaj ŭstanovy raspačata kryminalnaja sprava pa artykule 147 č.2 KK Respubliki Biełaruś — «Naŭmysnaje pryčynieńnie ciažkaha cialesnaha paškodžańnia». Raniej ni adzin z achoŭnikaŭ kłuba da kryminalnaj adkaznaści nie pryciahvaŭsia.