Mer Ńju‑Jorku pavinšavaŭ biełarusaŭ z Dniom Voli
Jon abviaściŭ dzień 25 sakavika 2008 hodu ŭ svaim horadzie Dniom biełaruskaj niezaležnaści. Tradycyja, jakoj amal piaćdziasiat hadoŭ.
«Bolš za stahodździe Ńju‑Jork źjaŭlajecca centram biełaruskaj kultury ŭ Złučanych Štatach i miescam, dzie biełarusy realizoŭvali svaje mary cieraź ciažkuju pracu, samaaddanaść i abjadnany duch», — havorycca ŭ zvarocie Majkła Błumberha, dasłanym Biełaruska‑amerykanskaha zadzinočańniu. ‑‑ Siońnia my ŭšanoŭvajem hetych śmiełych ludziej, čyja addanaść spravie svabody słužyć natchnieńniem dla ŭsich nas… Biełaruska‑amerykanskaje zadzinočańnie śviatkuje 90‑iu hadavinu Biełaruskaj Niezaležnaści ad Rasiejskaj imperyi. Svaboda była trahična karotkaj, ale mocnaje žadańnie hetaj arhanizacyi na svabodnaje volevyjaŭleńnie da hetaha času ruchaje jaje ahulnym ducham; usie žychary Ńju‑Jorku horača čakajuć dnia, kali biełarusy buduć žyć demakratyčna, u miry i dabrabycie».
Zvarot mera Niu‑Jorku zakančvajecca słovami: «Ja, Majkł Błumberh, mer Ńju‑Jorku, u pryznańnie hetaj važnaj hadaviny BNR, abjaŭlaju aŭtorak 25‑ha sakavika 2008 hodu ŭ horadzie Ńju‑Jorku Dniom Biełaruskaj Niezaležnaści», ‑‑ cytuje słovy Majkła Błumberha Radyjo Svaboda.
***
U zvarocie mera niama ničoha nadzvyčajnaha. Biełaruski dzień niezaležnaści abviaščajecca ŭ niekatorych amerykanskich haradach i štatach, ad pačatku 1960‑ch.
Heta stała mahčyma dziakujučy pracy dźviuch najbujniejšych etničnych arhanizacyj u hetaj krainie: Biełaruska‑amerykanskaha zadzinočańnia i Biełaruskaha kanhresavaha kamiteta, a taksama Aktu ab paniavolenych narodach, pryniatym kanhresam ZŠA ŭ 1959 h., u pieraliku jakich byli ŭklučanyja taksama ŭkraincy i biełarusy, niahledziačy na supraciŭ u ZŠA rasiejskaha łobi. Adpaviedna ŭłady na štatnym uzroŭni atrymali prava vydavać praklamacyi — h.zn. abviaščać dzień 25 Sakavika Biełaruskim dniom.
Tekst praklamacyj składajecca na padstavie materyjałaŭ, padadzienych samimi biełarusami.
Ad pačatku 1960‑ch biełaruski dzień abviaščaŭsia ŭ horadzie i štacie Ńju‑Jork, u štatach Ńju‑Džerzi i Ahajo, u haradach Saŭt‑Ryver, Ńju‑Branśvik (Ńju‑Džerzi), Kliŭlend (Ahajo), Puebła (Kałarada), Łos‑Andželes dy inš. -- haradach i štatach, dzie dziejničali najbolšyja biełaruskija supołki.
Tradycyjna ŭ hety dzień pierad budynkam meryi peŭnaha horadu uzdymajecca biełaruski ściah, a pradstaŭniki haradzkich uładaŭ, a ŭ maleńkich haradach sami mery biaruć aktyŭny ŭdzieł u śviatočnych mierapryjemstvach ładžanych biełarusami.
Tradycyja abviaščeńnia biełaruskaha dnia dažyła da našaha dnia ŭ Saŭt‑Ryvery. Adznačaŭsia Biełaruski dzień i ŭ kanadzkim Taronta.