U biełaruskich škołach moža źjavicca ŭrok futbołu
Pa subotach vučni zmohuć haniać miač na školnych placoŭkach i ŭ spartyŭnych zalach.
U novym navučalnym hodzie u škołach moža źjavicca dadatkovy ŭrok — «Hadzina futbołu». Pa subotach vučni zmohuć haniać miač na školnych placoŭkach i ŭ spartyŭnych zalach. Taksama meryja Miensku planuje ščylna zaniacca palapšeńniem futbolnaj infrastruktury.
U škołach buduć adradžacca futbolnyja sekcyi i specyjalizavanyja klasy. Pra heta i pra nieabchodnaść padniać zarobki dziciačym futbolnym treneram paviedamiŭ Michaił Vierhiajenka, namieśnik staršyni asacyjacyi «Biełaruskaja federacyja futbołu».
Pa słovach Vierhiajenki, ciapier u 122 specyjalizavanych škołach Biełarusi zajmajucca bolš za 126 tysiač junych futbalistaŭ. Kali da futbołu dałučacca i inšyja školniki, u samym papularnym vidzie sportu źjavicca bolej patencyjnych majstraŭ.
Budzie palapšacca i futbolnaja infrastruktura horadu. Naprykancy sakavika staličnaja meryja pryniała šerah rašeńniaŭ, siarod inšych — rekanstrukcyja stadyjonaŭ «Dynama», «Kamvolščyk», «Tarpeda» i «Traktar» u peryjad z 2008 pa 2011 hady. Planujecca pabudavać i novy kryty futbolny manež na 10 tysiač miescaŭ, a taksama novy stadyjon na 3,5 miescaŭ u rajonie Domu futbołu.
Što tyčycca školnaj futbolnaj infrastruktury, to ŭ kožnym rajonie Miensku spartovyja placoŭki buduć pryviedzienyja ŭ naležny vyhlad, a taksama pabudavanyja novyja.
Eduard Małafiejeŭ, futbolny specyjalist, adznačyŭ, što ŭvahi vartyja nia tolki materyjalna‑techničnyja pytańni:
«Nielha zabyvać i pra duchoŭna‑maralny aspekt, vychavańnie patryjatyzmu ŭ sercach i dušach junych spartoŭcaŭ».