MPZ: Padatak na «hramadzianski šlub» nichto nie raspracoŭvaje
Ministerstva pa padatkach i zborach nie raspracoŭvaje nijakaha padatku na pary, jakija žyvuć biez aficyjnaj rehistracyi šlubu, paviedamiŭ pres-sakratar MPZ Siarhiej Škut.
Raniej u internecie źjaviłasia publikacyja pra toje, što padatkovyja orhany nibyta majuć namier uvieści padatak na t.zv. «hramadzianski šlub», jaki b spahaniaŭsia ź niežanatych par, bolš za hod prapisanych na sumiesnaj žyłpłoščy biez svajakoŭ.
U materyjale byŭ detalova raśpisany miechanizm raźliku staŭki padatku ŭ zaležnaści ad času sumiesnaha žyćcia i najaŭnaści pazašlubnych dziaciej. Aŭtar artykuła spasyłaŭsia na ministra pa padatkach i zborach Siarhieja Nalivajku, jaki nibyta abhruntoŭvaŭ rašeńnie ab uviadzieńni novaha padatku tym, što jon prastymuluje niežanatyja pary aficyjna rehistravać svaje adnosiny.
Škut nazvaŭ hetuju publikacyju nonsensam, zapeŭniŭšy, što ministerstva nie płanuje ŭvodzić taki padatak. Jon taksama padkreśliŭ, što zakanadaŭstva nie ŭtrymlivaje paniaćcia «hramadzianski šlub».