Novaja małpačka ŭ Hrodzienskim zaaparku abrała sabie imia Oskar
Siońnia ŭ Hrodzienskim zaaparku novy jaho žychar — siamimiesiačny łapunder — vybraŭ sabie imia. U dzień uručeńnia pryzoŭ Amierykanskaj kinaakademii jon vyrašyŭ nazyvacca Oskaram.
Z pytańniem, jak nazvać małpačku, kiraŭnictva zaaparka źviarnułasia da hrodziencaŭ i haściej horada. Na praciahu niekalkich dzion usie achvotnyja pakidali svaje varyjanty imionaŭ u śpiecyjalnaj skryni: siońnia łapunderu zastavałasia tolki vyciahnuć upadabanuju papierku.
«Usiaho ž hrodziency pradstavili bolš za 200 varyjantaŭ imionaŭ. Niekatoryja pisali novamu žycharu zaaparka cełyja listy», — raspaviali ŭ Hrodzienskim zaałahičnym parku. Tam adznačyli, što z aŭtaram imia nieŭzabavie źviažucca i ŭznaharodziać jaho biaspłatnym naviedvańniem zaaparka i fotasiesijaj z padapiečnym.
«Raście mały dobra. Asvojvajecca na novym miescy. Vielmi palubiŭ arechi i cukierki. Z zadavalnieńniem jeść banany i mandaryny, ale nie admaŭlajecca ad biełaruskich jabłykaŭ, morkvy i tvarahu», — raskazvajuć supracoŭniki zaaparka. Darečy, ź lubimych łasunkaŭ novaha žychara ŭ kafe zaaparka zrabili śpiecyjalny desiert, jaki nazvali pačastunkam ad Oskara. Paspytać jaho možna ŭžo ź siońniašniaha dnia.