U Baranavičach 51-hadovy mužčyna zabiŭ piensijaniera, rasčlaniŭ cieła i zakapaŭ
Jak paviedamiŭ aficyjny pradstaŭnik upraŭleńnia Śledčaha kamiteta pa Bresckaj vobłaści Maryna Drańkova, 18 sakavika ŭ pravaachoŭnyja orhany źviarnułasia 52-hadovaja žycharka Baranavič z zajavaj ab źniknieńni muža. Žonka i muž žyli asobna, apošni raz jana mieła znosiny z mužam 15 sakavika.
Pavodle słoŭ žančyny, 18 sakavika ŭ kvatery muža jana vyjaviła źniknieńnie televizara i inšych rečaŭ, a taksama zamytyja plamy kryvi na padłozie.
Na miesca zdareńnia vybyła śledča-apieratyŭnaja hrupa z pryciahnieńniem pierasoŭnaj kryminalistyčnaj łabaratoryi Śledčaha kamiteta. Ahlad pravodziŭsia z udziełam ekśpiertaŭ-bijołahaŭ Dziaržaŭnaha kamiteta sudovych ekśpiertyz.
Supracoŭnikami orhanaŭ unutranych spraŭ padčas apieratyŭna-vyšukovych mierapryjemstvaŭ było ŭstanoŭlenaje dačynieńnie da ŭčynieńnia złačynstva 51-hadovaha niepracoŭnaha žychara Baranavič. Padčas vobysku pa miescy jaho žycharstva vyjaŭlenaja vykradzienaja majomaść.
Padazravany zatrymany. Pavodle jaho słoŭ, zabojstva jon učyniŭ pa miescy žycharstva piensijaniera 16 sakavika padčas raptoŭna ŭźnikłaj svarki. Z udziełam padślednaha praviedzienaja pravierka pakazańniaŭ na miescy, i toj nazvaŭ miesca na ŭskrainie Baranavič, dzie na pustcy schavaŭ rasčlaniony trup zabitaha.
Dla ŭstanaŭleńnia pryčyny śmierci mužčyny pryznačanaja sudova-miedycynskaja ekśpiertyza. Asoba zabitaha paćvierdžanaja vysnovami ekśpiertnych daśledavańniaŭ.
Pravodziacca nieadkładnyja śledčyja i inšyja pracesualnyja dziejańni dla ŭstanaŭleńnia ŭsich akaličnaściaŭ zdareńnia. Pryznačany kompleks sudovych ekśpiertyz.
Śledčym upraŭleńniem USK pa Bresckaj vobłaści raspačataja sprava na padstavie č. 1 art. 139 KK (zabojstva). Dla vytvorčaści papiaredniaha rasśledavańnia stvoranaja śledčaja hrupa.