Lisica raskapała staražytny mohilnik u Biełaviežskaj puščy
Na ŭskrainie vioski Viły Kamianieckaha rajona pablizu adnajmiennaha archieałahičnaha abjekta znojdzieny frahmienty škileta čałavieka, paviedamiŭ navukovy supracoŭnik nacyjanalnaha parku «Biełaviežskaja pušča» Rusłan Kniha.
Taksama ŭ lisinaj nary znachodziłasia vialikaja kolkaść frahmientaŭ kieramiki, identyčnaj toj, jakaja była znojdziena padčas archieałahičnych raskopak u 2007 hodzie. Artefakty vyjaŭlenyja za niekalki mietraŭ ad archieałahičnaha abjekta «Viły-2» — pasielišča epochi miezalitu, niealitu, bronzavaha vieku i Siaredniaviečča.
Pra niezvyčajnuju znachodku paviedamili miascovyja žychary. Čałaviečyja pareštki adpravili na ekśpiertyzu. Tam paćvierdzili: frahmientam škileta nie mienš za try sotni hadoŭ.
«Mahčyma, lisa raskapała staražytny mohilnik. Novyja znachodki śviedčać, što kulturny płast hetaha abjekta jašče nie da kanca vyvučany. Takim čynam, u dalejšych archieałahičnych pošukaŭ jość pierśpiektyva. Usie artefakty buduć apisanyja i, pa mahčymaści, dapoŭniać histaryčnuju ekspazicyju Muzieja pryrody nacparka», - paviedamiŭ Rusłan Kniha.
Heta nie pieršy vypadak, kali žyvioły dapamahajuć navukoŭcam vyjavić ślady historyi. Tak, dziesiać hadoŭ tamu va ŭročyščy Jazvy na miescy piasčanaj «kupalni» zubroŭ była znojdzienaja kamiennaja siakiera časoŭ niealitu.
Stajanka čałavieka pieryjadu poźniaha niealitu i bronzavaha vieku, jakaja atrymała nazvu «Archieałahičny abjekt «Viły-2», znachodzicca na paŭdniova-zachodniaj uskrainie Biełaviežskaj puščy, la miesca źlićcia rek Lasnaja Pravaja i Biełaja. Abjekt archieałohii adkryty ŭ 2007 hodzie. Na staražytnym sieliščy archieołahi znajšli bolš za tysiaču artefaktaŭ, pačynajučy ad V stahodździa da našaj ery i da pieryjadu Siaredniaviečča. U pryvatnaści, na hetaj terytoryi znojdzienyja materyjały Prypiacka-niomanskaj rańnieniealityčnaj kultury i frahmienty kieramiki sa šnuravoj arnamientacyjaj poźniaha niealitu i rańniaha bronzavaha vieku.