Sieviarynca i Statkieviča buduć sudzić za akcyju pradprymalnikaŭ la Ministerstva pa padatkach i zborach
Sud Maskoŭskaha rajona Minska 6 krasavika razhladaje administracyjnyja spravy sustaršyni arhkamiteta pa stvareńni partyi «Biełaruskaja chryścijanskaja demakratyja» Paŭła Sieviarynca i byłoha palitviaźnia Mikałaja Statkieviča.
Palitykaŭ abvinavačvajuć u praviadzieńni niesankcyjanavanaha mierapryjemstva 14 sakavika kala budynka Ministerstva pa padatkach i zborach u Minsku.
Raniej stała viadoma, što ŭ hety ž dzień sud razhledzić i administracyjnuju spravu ŭ dačynieńni da staršyni respublikanskaha hramadskaha abjadnańnia «Pierśpiektyva» Anatola Šumčanki.
Jak paviedamiŭ Statkievič, pra sud jaho apaviaścili SMS-paviedamleńniem. Reahavać na jaho palityk nie maje namieru. Jon adznačyŭ, što na «chakieraŭ nie paviadziecca».
Pry hetym Statkievič paviedamiŭ, što ź jaho piensii stali ŭtrymlivać 20% u jakaści apłaty papiarednich štrafaŭ. «Niachaj vyličvajuć, moža, za hadoŭ 10 vyličać. Mianie zaraz naohuł hetyja štrafy nie cikaviać. Ja, kali byŭ u RUUS, pieradaŭ dakumienty, što ŭ mianie ničoha niama va ŭłasnaści», — skazaŭ jon.
Sieviaryniec daviedaŭsia pra sud z pratakoła, jaki pryjšoŭ pa pošcie. «Pryjšoŭ pratakoł za ŭdzieł u akcyi pradprymalnikaŭ, što ja na joj kryčaŭ «Žyvie Biełaruś!» i «Pracu!», — paviedamiŭ palityk.
Akramia taho, Sieviaryncu pryjšli jašče dva pratakoły: za ŭdzieł u akcyi 25 sakavika z nahody Dnia Voli i ŭ akcyi kala pasolstva Rasii ŭ padtrymku asudžanaj u Rasii ŭkrainskaj lotčycy Nadziei Saŭčanki. Daty sudoŭ pa hetych administracyjnych spravach pakul nie viadomyja.
Nahadajem, 14 sakavika kala budynka Ministerstva pa padatkach i zborach u Minsku Šumčanka i Statkievič arhanizavali impravizavany mitynh z udziełam prykładna dvuchsot čałaviek. Pradprymalniki pieradali ŭ MPZ kalektyŭny zvarot z patrabavańniem admieny ŭkaza № 222.