«Havary praŭdu» prapanavała Savietu Respubliki pačać stvareńnie Nacyjanalnaha ŭniviersiteta z fakulteta ŭ BDU
Hetuju inicyjatyvu adzin ź lideraŭ hramadzianskaj kampanii «Havary praŭdu» Andrej Dźmitryjeŭ ahučyŭ 13 krasavika na sustrečy sa staršyniom stałaj kamisii Savietu Respubliki pa adukacyi, kultury, navucy i sacyjalnym raźvićci Mikałajem Kazaraŭcom:
«Ja nahadaŭ staršyni kamisii, što stvareńnie Nacyjanalnaha ŭniversytetu ŭvachodziła ŭ pieradvybarčuju prahramu Taciany Karatkievič. I što było dla mianie niečakana i pryjemna — padałosia, što spadar Kazaraviec razumieje: taki ŭniversytet patrebny. Ale, na dumku staršyni kamisii, my pakul nie hatovyja dla adkryćcia paŭnavartasnaha ŭniversytetu. Nie chapaje, asabliva ŭ techničnych specyjalnaściach, biełaruskamoŭnych materyjałaŭ, vykładčykaŭ, daśledčykaŭ. Ale ruchacca ŭ hetym kirunku treba.
Tamu my prapanavali: davajcie pačniom ź biełaruskamoŭnaha fakultetu ŭ BDU. Padrychtavacca i adkryć całkam biełaruskamoŭny fakultet. A zatym pamału pryjdziem i da Biełaruskaha nacyjanalnaha ŭniversytetu».
Padčas sustrečy abmierkavali jašče dźvie temy — «čornyja śpisy» ŭ kultury i supracoŭnictva Ministerstva kultury z hramadzianskaj supolnaściu ŭ miežach Hodu kultury. Pra aktualnaść hetaha jaskrava śviedčyć infarmacyja, što dziesiacirazovaha čempijona śvietu Vitala Hurkova zvolnili ź Ministerstva sportu i turyzmu za ŭdzieł u hurcie Brutto, a Ministerstva kultury kancentrujecca vyklučna na dziaržaŭnych prahramach, pakidajučy pa-za ŭvahaj niedziaržaŭnych prapahandystaŭ biełaruskaj kultury. Kiraŭniki i eksperty kampanii «Havary praŭdu» abyšli ŭsie biez vyklučeńnia kamisii Pałaty pradstaŭnikoŭ i try ź piaci kamisijaŭ Savietu Respubliki.