U vajskovaj čaści Starych Daroh znojdzieny trup vajskoŭca terminovaj słužby
Usio adbyłosia viečaram niadzieli 10 krasavika. Krynica Onliner.by śćviardžaje, što Alaksandr razmaŭlaŭ z baćkami ŭ 19:30, a ŭžo ŭ 21:15 pastupiŭ zvanok z čaści i im paviedamili pra śmierć syna.
Taksama było skazana, što na apaznańni baćki ŭbačyli pakrytaje hiematomami cieła i traŭmy hałavy. Paćvierdzić hetuju infarmacyju ŭ samich svajakoŭ nie ŭdałosia. Ale fakt śmierci vajskoŭca terminovaj słužby paćvierdzili adrazu niekalki krynic. U Ministerstvie abarony kažuć pra inšyja abstaviny.
«Usie apisanyja vami abstaviny nie adpaviadajuć rečaisnaści [pytańnie stajała ab traŭmach i mahčymym kryminalnym aśpiekcie]. Učynak vajskoŭca nie źviazany z prachodžańniem vajennaj słužby, — raspaviali ŭ pres-słužbie Minabarony. — Tamu z etyčnych mierkavańniaŭ my nijakich kamientaroŭ nie dajom».
Jašče adna krynica raspaviała, što siarod vajskoŭcaŭ chodzić viersija pra samahubstva:
«Nam raskazali, što chłopiec paviesiŭsia. Heta było nijak nie źviazana z vykanańniem zadač i abaviazkaŭ abo prachodžańniem słužby. Mahčyma, asabistyja pryčyny».
Alaksandr pryzyvaŭsia z Maładziečna letaś uvosień. Słužbu prachodziŭ u vojskach radyjacyjnaj, chimičnaj i bijałahičnaj abarony ŭ Starych Darohach. Učora adbyłosia pachavańnie.
«Upraŭleńniem Śledčaha kamiteta pa Minskaj vobłaści pravodzicca pravierka pa fakcie śmierci vajskoŭca terminovaj słužby, — raspavioŭ načalnik adździeła infarmacyi i suviazi z hramadskaściu Śledčaha kamiteta Siarhiej Kabakovič. — Adna ź viersij zdareńnia — suicyd z-za prablem asabistaha charaktaru. Praviedzieny ahlad miesca zdareńnia, apytanyja słužbovyja asoby, vyvučajucca abstaviny prachodžańnia słužby».
Taksama vyvučajucca asabistyja rečy, siarod jakich mabilny telefon i pieradśmiarotnaja zapiska. Pryznačanyja ekśpiertnyja daśledavańni, u tym liku sudova-miedycynskaja i počyrkaznaŭčaja ekśpiertyzy.