Mutko vybačajecca za dopinh-skandał i prosić puścić rasijan na Alimpijadu
Ministr sportu Rasii Vital Mutko paprasiŭ prabačeńnia za dopinh-skandał, u vyniku jakoha rasijskich lohkaatletaŭ mohuć nie dapuścić da ŭdziełu ŭ Alimpijskich hulniach u Rya-de-Žaniejra ŭ žniŭni hetaha hoda.
EPA
U artykule, apublikavanym u brytanskaj haziecie Sunday Times, Mutko pryznaje, što «surjoznyja pamyłki byli dapuščanyja kiraŭnictvam Usierasijskaj fiederacyi lohkaj atletyki (UFŁA), a taksama spartoŭcami i trenierami, jakija parušyli antydopinhavyja praviły i zabylisia na pryncypy sumlennaj hulni, hetak fundamientalnyja dla sportu, dziela imhniennaha pośpiechu».
«Ja chaču ŭnieści jasnaść. Nam soramna za ich», — zajaŭlaje rasijski ministr sportu.
«My prynosim prabačeńni za toje, što atlety, jakija sprabavali padmanuć nas i ŭvieś śviet, nie byli złoŭlenyja raniej, — dadaje Mutko. — My prynosim prabačeńni, tamu što Rasija prychilnaja najvyšejšym standartam u sporcie».
Pry hetym Vital Mutko ličyć, što «rašeńnie adchilić rasijskich atletaŭ ad udziełu ŭ Alimpijadzie-2016 źjaŭlajecca niespraviadlivym i niepraparcyjnym pakarańniem».
Jon nastojvaje na tym, što «atlety, jakija nikoli nie sprabavali atrymać pieravahi niesumlennym šlacham, z dapamohaj dopinhu, nie pavinny być pakaranyja za ŭčynki inšych», i zaŭvažaje, što «rasijskija atlety nie pavinny pieratvarycca ŭ kazłoŭ adpuščeńnia, kali havorka idzie pra hłabalnuju prablemu».
Adnak u kamientary Sunday Times, jaki supravadžaje hetuju artykuł, adznačajecca, što Mutko ŭskładaje vinu vyklučna na asobnych spartsmienaŭ i trenieraŭ i admaŭlajecca pryznać, što da adnaho z samych maštabnych dopinh-skandałaŭ u historyi sportu byli datyčnyja i rasijskija ŭłady.
Miž tym, piša hazieta, hety skandał praciahvaje nabirać abaroty.
Čarhovy vitok dopinhavaha skandału adbyŭsia dniami, kali źjaviłasia intervju byłoha kiraŭnika maskoŭskaj antydopinhavaj łabaratoryi Ryhora Rodčankava, u jakim toj zajaviŭ, što padčas Alimpijady ŭ Sočy dziasiatki rasijskich spartsmienaŭ, u tym liku załatyja miedalisty, užyvali dopinh.
Krychu raniej były supracoŭnik Rasijskaha antydopinhavaha ahienctva (RUSADA) Vital Ściapanaŭ raspavioŭ u intervju amierykanskamu kanału Si-bi-es, što dopinh-kantrolem u Sočy kiravała FSB.
U minułuju piatnicu Suśvietnaje antydopinhavaje ahienctva (WADA) zajaviła, što praviadzie pravierku hetych zajaŭ, pry hetym jaho kiraŭnik Krejh Rydzi skazaŭ, što nie vałodaje infarmacyjaj pra ŭžyvańnie dopinhu na Alimpijskich hulniach u Sočy.
Vital Mutko nazvaŭ novyja abvinavačvańni byłych supracoŭnikaŭ RUSADA čarhovymi śpiekulacyjami.
U subotu ŭ intervju Bi-bi-si kiraŭnik WADA vykazaŭ mierkavańnie, što «vielmi małavierahodna, što RUSADA budzie adpaviadać nieabchodnym patrabavańniam da pačatku Hulniaŭ u Rya».
Dakład ab vykanańni Rasijaj patrabavańniaŭ Suśvietnaha antydopinhavaha ahienctva budzie nakiravany ŭ Mižnarodny alimpijski kamitet, jaki zatym vyrašyć, ci zmohuć rasijskija lohkaatlety vystupić 5-21 žniŭnia na letnich Hulniach, paviedamiŭ Rydzi.
Dakład budzie taksama nakiravany ŭ Mižnarodnuju asacyjacyju lohkaatletyčnych fiederacyj, jakaja pavinna pryniać rašeńnie ab źniaćci dyskvalifikacyi z rasijskaj fiederacyi lohkaj atletyki.