Tysiačy čałaviek pryjšli raźvitacca z Paŭłam Šaramietam u Minsku
Siońnia ŭ Minsku na Paŭnočnych mohiłkach adbudziecca pachavańnie zabitaha ŭ Kijevie žurnalista Paŭła Šaramieta. U chramie Usich Śviatych na vulicy Kalinoŭskaha, 121 prachodzić panichida, jakaja budzie doŭžycca da 14.00.
Raźvitacca z žurnalistam pryjšli ŭžo kala 500 čałaviek. Čarha da ŭvachoda ŭ chram raściahnułasia na dobrych sto mietraŭ.
Žurnalistaŭ z technikaj u pamiaškańnie, dzie staić truna, nie puskajuć. La truny ź ciełam Šaramieta — žonka Paŭła Natalla, siabroŭka Alena Prytuła, ukrainski žurnalist i deputat Mustafa Najem, supracoŭniki amierykanskaj ambasady.
Taksama žurnalist «Našaj Nivy» ubačyŭ la carkvy namieśnika kiraŭnika Administracyi prezidenta Ihara Buzoŭskaha — ci padychodziŭ jon raźvitacca z Šaramietam, nieviadoma.
Prysutničajuć vyšejšyja čyny milicyi ŭ cyvilnym, pavodziać siabie spakojna i karektna. Šmat zdymačnych hrup ukrainskich telekanałaŭ — 1+1, Inter. Pryjechali i žurnalisty rasijskaha Pieršaha kanała, jany trymajucca asabniakom. Za hadzinu, što prachodzić cyrymonija raźvitańnia, nie źjaviŭsia nivodzin biełaruski aficyjny kanał.
Da 12-j hadziny tych, chto pryjšoŭ raźvitacca, było ŭžo kala tysiačy. Zbolšaha ŭ čarzie ludzi siaredniaha vieku, jość i moładź. Achova pa pierymietry chrama pavodzić siabie spakojna, nikoha nie abšukvaje.
V.a. pavieranaha ŭ spravach ZŠA ŭ Minsku Džordž Noł: «My pryjšli addać daninu pamiaci čałavieku, jaki byŭ vierny svaim pryncypam, zmahaŭsia za svabodu słova i pracy žurnalista. Svaich viersij nakont taho, što zdaryłasia, my nie vystaŭlajem — budziem čakać aficyjnych».
Lidar partyi levych «Spraviadlivy śviet» Siarhiej Kalakin: «Z Paŭłam my nie byli palityčnymi sajuźnikami, šmat u čym našyja mierkavańni razychodzilisia. Časam ja nie padrymlivaŭ jahony sproščany pohlad na vyrašeńnie prablem u Biełarusi. Niahledziačy na heta, Pavieł, choć nie žyŭ na Radzimie, byŭ jaje ščyrym patryjotam. Biełaruś šmat straciła ź jaho sychodam.
U svoj čas, kali na Paŭła zaviali spravu, ja dapamoh jamu zajechać u Rasiju. Heta taja maleńkaja detektyŭnaja historyja, što nas źviazvaje».
Sustaršynia BCHD Pavieł Sieviaryniec: «Z Šaramietam my byli znajomyja daŭno. Jon dobra viedaŭ realii troch krain — Biełarusi, Rasii, Ukrainy. Ź jaho sychodam Biełaruś straciła zorku».
Žurnalistka Śviatłana Kalinkina: «Ciažka skazać, što zaraz budzie z «Biełaruskim partyzanam», bo tam za ŭsio adkazvaŭ Pavieł. Vieru, što jaho zabojstva budzie raskrytaje, bo pa haračych śladach heta zrabić lahčej».
Kali trunu ź ciełam žurnalista pačali vynosić z carkvy, prysutnyja ludzi pačali śpiavać «Mahutny boža», zahłušyŭšy pravasłaŭnych śviataroŭ, jakija śpiavali pa-rusku.
A jak tolki trunu zahruzili ŭ mašynu, ludzi zaplaskali ŭ dałoni i nie spynialisia chvilin piać, pakazvajučy takim čynam pavahu — kali ŭ apošni šlach, dyk pad apładysmienty.
Svajaki Šaramieta i šmat chto ŭ hety momant nie stali strymlivać siabie, zapłakaŭšy.