Asudžanyja kryčaŭskaj papraŭčaj ustanovy vystupili suprać nizkaj apłaty pracy
Asudžanyja papraŭčaj ustanovy adkrytaha typu № 45 (Kryčaŭ), pryciahnutyja da padrychtoŭki Mścisłava da «Dažynak», pratestujuć suprać nizkaj apłaty i ŭmoŭ pracy, paviedamiŭ BiełaPAN svajak adnaho z asudžanych.
Pavodle jaho słoŭ, asudžanyja pracujuć u jakaści roznarabočych, ramantujučy i adnaŭlajučy budynki ŭ centry Mścisłava.
«Pracujuć jany pa 11 hadzin na dzień z adnym vychadnym na tydzień. Učora rabočyja z PUAT № 45 atrymali raźlikovyja listy z zarobkam 150 rubloŭ. Kali jany daviedalisia pra toje, što zvyčajny roznarabočy volnanajomny atrymaŭ raźlikovy z 500 rublami, jany abviaścili bajkot. Byŭ zaprošany prakuror Mścisłava, jaki paabiacaŭ razabracca ŭ niespraviadlivaj apłacie pracy i syšoŭ. Siońnia administracyja ŭstanovy № 45 usich rabotnikaŭ, jakija nibyta arhanizavali zabastoŭku, a ich 12 čałaviek, nie vypuściła na pracu i pahražaje zamienaj režymu i adpraŭkaj u kałoniju», — raskazaŭ svajak.
U hety momant, pavodle jaho słoŭ, 12 asudžanych znachodziacca ŭ miescy adbyćcia svajho pakarańnia ŭ Kryčavie. «Ich zaraz tam trymajuć, nie vypuskajuć, kažuć, nikudy nie pojdziecie, budziecie siadzieć tut», — paviedamiŭ svajak asudžanaha, adznačyŭšy, što «administracyja lutuje» — u tych, chto vykazali pratest, adabranyja ŭsie srodki suviazi.
Namieśnik načalnika PUAT № 45 Julija Kac nie abvierhła, ale i nie paćvierdziła infarmacyju pra zabastoŭku u papraŭčaj ustanovie, paraiŭšy źviarnucca da načalnika Alaksieja Kašanskaha. Atrymać kamientaryj u jaho pakul nie ŭdałosia.