Samaja niebiaśpiečnaja — 1 kapiejka: u dzień da miedykaŭ pryvoziać da 30 dziaciej, što hłytajuć maniety
Štodnia ŭ Respublikanski navukova-praktyčny centr dziciačaj chirurhii pryvoziać troch-piaciarych dziaciej, što prahłynuli maniety. U cełym pa krainie kolkaść takich vypadkaŭ moža dachodzić da 30 u dzień.
Fota Siarhieja Hudzilina
Pra heta raspavioŭ Alaksandr Śvirski, zahadčyk adździeła dziciačaj chirurhii RNPC.
— Siońnia, naprykład, dzicia, jakoje lečycca ŭ instytucie traŭmatałohii i artapiedyi, jedzie da nas, kab vydalić sa straŭnika manietu. Učora ŭviečary prahłynuŭ, — raspaviadaje Alaksandr Śvirski.
Kanstancin Drazdoŭski, dyrektar Respublikanskaha navukova-praktyčnaha centra dziciačaj chirurhii, dadaŭ, što chirurhičnych umiašańniaŭ ŭ suviazi z dastavańniem maniet mienš, čym zvarotaŭ. Nie kožnuju manietu treba apieratyŭna dastavać, jana moža vyjści z arhanizma naturalnym šlacham.
Pa słovach Alaksandra Śvirskaha, najbolš niebiaśpiečnyja dla dziaciej drobnyja maniety, asabliva — adna kapiejka. Dzicia jaje moža nie tolki prahłynuć, ale i ŭdychnuć.
— Kali manieta patrapiła ŭ dychalnyja šlachi, vy nie zmožacie akazać dapamohu, i dzicia moža zahinuć. Vymańnie z dychalnych šlachoŭ praciakaje vielmi traŭmatyčna. Takich pacyjentaŭ ź inšarodnymi ciełami ŭ dychalnych šlachach dosyć šmat było ŭ minułym hodzie ŭ Viciebskaj vobłaści. Niekalki dziaciej zahinuli, — adznačaje jon.
Kali manieta patrapiła ŭ straŭnikava-kišačny trakt, to stupień traŭmatyzacyi zaležyć ad pamieru maniety, času, jaki jana tam znachodzicca, i taho, jak doŭha miedyki nie mieli mahčymaści nazirać pacyjenta.
Kali ŭvohule kazać pra inšarodnyja cieły, jakija moža prahłynuć dzicia, to bolšuju niebiaśpieku, čym maniety, pradstaŭlajuć batarejki.
Jany prapalvajuć nie tolki ścienki stravavoda, ale i susiednich orhanaŭ, naprykład, trachiei. Ź piaci dziaciej, jakija prahłynuli batarejki i jakich sprabavali vyratavać u RNPC dziciačaj chirurhii, troje zahinuli.
Čaściej za ŭsio prahłynuć inšarodnyja cieły sprabujuć dzieci va ŭzroście da piaci hadoŭ.
Alaksandr Śvirski nahadvaje: dzicia paznaje śviet praz smakavyja receptary, tamu i sprabuje pasprabavać pradmiety na smak.
Pry hetym jon u pieršuju čarhu źviartaje ŭvahu na rečy, jakija znachodziacca na ŭzroŭni vačej. Darosłyja pavinny heta ŭličvać i prybrać usie niebiaśpiečnyja pradmiety ŭ miežach dasiažnaści dziaciej.
— Kali dzicia maŭčyć i prycichła, značyć, idzicie i hladzicie, što jano robić, - rekamienduje śpiecyjalist.