Taćciana Karatkievič vychodzić z BSDP (Hramada)
Eks-kandydat u prezidenty Taćciana Karatkievič vyrašyła vyjści ź Biełaruskaj sacyjał-demakratyčnaj partyi (Hramada), u jakoj jana była z 2000 hoda. U kamientary TUT.BY jana patłumačyła svajo rašeńnie, u pieršuju čarhu, tym, što ŭznačalvaje inšuju strukturu — kampaniju «Havary praŭdu».
Fota Dźmitryja Bruško, Tut.by
— Rašeńnie źviazana sa źmianieńniem majho statusu, užo bolš za paŭhoda ja sustaršynia inšaj arhanizacyi. Dla mianie pryncypova, i dla farmiravańnia novaj kamandy, važna być sumlennaj, prazrystaj, zrazumiełaj, kab usie bačyli, što ŭznačalvaju adnu arhanizacyju.
Pa słovach Karatkievič, u jaje zastajecca šmat siabroŭ u BSDP (Hramada) i jana płanuje praciahvać pracavać razam ź imi.
Na pytańnie, ci źviazana heta rašeńnie palityka z tym, što kiraŭnictva jaje ŭłasnaj partyi vyrašyła nie padtrymlivać jaje na prezidenckich vybarach, Karatkievič adkazała:
— Kiraŭnictva partyi daŭno demanstruje svaju prychilnaść być farmalistami. Heta pryviało apazicyju da kadravaha i ideałahičnamu kryzisu. Patrebnyja novyja padychody, patrebna takaja arhanizacyja jak u nas u «Havary praŭdu».
Pa słovach palityka, u jaje struktury jość kultura dyjałohu, a sama «Havary praŭdu» nastrojenaja na pracu z hramadstvam.
Lidar BSDP (Hramada) Iryna Vieštard adznačyła, što Taćciana Karatkievič, užo padajučy dakumienty na rehistracyju kandydatam u parłamient, nie pakazała, što znachodzicca ŭ partyi.
— Čałaviek abaviazkova pavinien vyznačycca, dzie jon, z kim jon i jak jon dziejničaje. Čałaviek maje prava być u partyi, ci nia być. Ja heta ŭsprymaju narmalna, biez usialakaha lamantu, stanoŭčych ci admoŭnych momantaŭ. Ja nie maju nijakaha namieru jaje prava adbirać.
BSDP (Hramada) sabrała amal 20 tysiač podpisaŭ u padtrymku Karatkievič na prezidenckich vybarach, ale potym vyrašyła vyjści z kampanii. Pa hetym šlachu pajšli i astatnija struktury kaalicyi «Narodny refierendum» — partyja BNF i ruch «Za svabodu». Paśla prezidenckich vybaraŭ kampanija «Narodny refierendum» była zhornutaja.