Bajaviki ID zachapili 2000 mirnych žycharoŭ na poŭnačy Siryi
Bajeviki «Isłamskaj dziaržavy» zachapili ŭ pałon kala 2 tysiač mirnych žycharoŭ i mohuć vykarystoŭvać ich u jakaści «žyvoha ščyta» padčas svajho adstupleńnia, paviedamili siryjskija vajennyja.
Zachop adbyŭsia padčas adychodu sił ID z horada Manbidž na poŭnačy krainy. Infarmacyju ab vykradańni mirnych žycharoŭ paćvierdzili taksama ŭ siryjskim Centry manitorynhu za vykanańniem pravoŭ čałavieka, jaki bazujecca ŭ Łondanie, udakładniŭšy, što ludziej pahruzili ŭ sotni aŭtamabilaŭ i pavieźli ŭ bok horada Džierabłus.
Stratehična važny siryjski horad Manbidž na paŭnočnym uschodzie Siryi, niedaloka ad miažy z Turcyjaj, byŭ uziaty pad kantrol tydzień tamu apazicyjnym aljansam z udziełam kurdskich i arabskich paŭstancaŭ.
Bai za Manbidž ciahnulisia dva miesiacy. «Isłamskaja dziaržava» ŭtrymlivała horad bolš za dva hady.
Dla džychadzistaŭ Manbidž byŭ suviaznym źvianom pamiž aporaj ID — Rakaj la tureckaj miažy — i astatnimi padkantrolnymi rajonami ŭ pravincyi Alepa.
U pałon da bajevikoŭ ID trapili žychary horada al-Sirb, na poŭnač ad Manbidža.
Pavodle dadzienych Centra manitorynhu, u chodzie bajoŭ za Manbidž zahinuli 437 mirnych žycharoŭ, 105 ź ich — dzieci.