Jak dziaŭčatki traplajuć u baraćbu: piać faktaŭ pra miedalistku Alimpijady Maryju Mamašuk
Biełaruskaja spartoŭka Maryja Mamašuk zavajavała srebrany miedal na Alimpijadzie ŭ Rya pa volnaj baraćbie. U vyrašalnaj schvatcy Maryja, na žal, sastupiła japoncy Rysaka Kavai ź likam 6:0.
«NN» sabrała cikavyja fakty ź bijahrafii miedalistki.
U baraćbu trapiła vypadkova
Maryi Mamašuk 23 hady. Sama jana pachodzić z pasiołka Ziabraŭka, jaki znachodzicca za 12 kiłamietraŭ ad Homiela. Z abłasnym centram Ziabraŭku złučaje čyhunka. Miastečka hetaje niemałoje — amal na tysiaču žycharoŭ. Admietna, što ŭžo druhi miedal za Biełaruś biare čałaviek ź vioski (pieršym byŭ Vadzim Stralcoŭ), a jašče ž jość Ivan Cichan!
Maryja kaža, što ŭ baraćbu trapiła dastatkova vypadkova. U škołu pryjechaŭ trenier z Homiela. Siabroŭka zaciahnuła na treniroŭku, praz paru tydniaŭ zastałasia tolki Maryja i paru chłopcaŭ. U chutkim časie Mamašuk zabrali ŭ vučylišča nacyjanalnaha alimpijskaha reziervu ŭ Homiel.
Maci vyhadavała dačku adna
Maci spartsmienki, jakaja pracuje na ptuškafabrycy «Śvitanak», spačatku pastaviłasia da takoha vybaru dački ź niedavieram, tamu Maryja chadziła na treniroŭki ŭcichuju ad jaje.
Usia siamja Maryi Mamašuk składajecca ź jaje i maci. Atletka raskazvała, što bolš za ŭsio lubić jeści maminy blinčyki i kampot. «Vielmi sumuju pa mamie, praz ščylny hrafik my redka bačymsia», — kaža Maryja.
Taksama jana poruč z matulaj u spartyŭnych zasłuhach stavić svajho maładoha čałavieka. Imia nie nazyvaje, ale kaža, što jon taksama barec. «Moža hramatna padtrymać u momanty redkich zryvaŭ».
Pierad Alimpijadaj źmianiła vahavuju katehoryju
Raniej Maryja Mamašuk vystupała ŭ katehoryi da 63 kiłahramaŭ, ciapier pierajšła ŭ da 68. Atletka kaža, što vielmi ciažka było skidvać vahu, «sušycca» pierad startami: «Vystupać u novaj vahavaj katehoryi vielmi cikava. Nieznajomyja supiernicy, žadańnie pravieryć svaje siły».
U vahavaj katehoryi da 63 kiłahramaŭ Mamašuk była druhoj na čempijanacie Jeŭropy-2014, a sioleta ŭžo vyjhrała Jeŭra ŭ katehoryi da 68 kh. Ź inšych dasiahnieńniaŭ — bronza Jeŭrapiejskich hulniaŭ i čempijonka Jeŭropy siarod junijoraŭ.
Ciapier Mamašuk trenirujecca ŭ słavutaha barca Siarhieja Smala, jaki taksama niekali braŭ miedal na Alimpijskich hulniach, byŭ čempijonam śvietu.
Rychtavałasia da Alimpijady ŭ Asiecii
Kali Vasilisa Marzaluk, aproč Biełarusi, rychtavałasia da Hulniaŭ va Ukrainie i Bałharyi, to Maryja Mamašuk pajechała ŭ Paŭnočnuju Asieciju. Ni dla kaho nie sakret, što najmacniejšyja rasijskija barcy jakraz z Kaŭkaza — Dahiestana i Asiecii.
U intervju haziecie «Spartyŭnaja panarama» Mamašuk kazała, što jeździła tudy nie dla trenirovak, a ŭ centr zdaroŭja Siarhieja Bubnoŭskaha. Asnoŭnaj zadačaj hetaj pajezdki było navučycca paźbiahać traŭmaŭ, a taksama ŭmacavańnie źviazak i suchažyllaŭ.
«Jechać na Alimpijadu, kab prosta paŭdzielničać — heta nie ŭ maich praviłach», — kazała Mamašuk, chacia jaje nichto ŭsurjoz i nie adnosiŭ da alimpijskich nadziej Biełarusi.
Lubimaja kaviarnia, kniha, horad
Maryja navučajecca ŭ Homielskim dziaržaŭnym univiersitecie imia Skaryny na fakultecie fizičnaha vychavańnia. Dziaŭčyna kaža, što volnaha času praktyčna nie maje. Kali źjaŭlajecca redkaja mahčymaść, to imkniecca pravieści čas ź siabrami ci pačytać knižku. Siarod svaich lubimych aŭtaraŭ nazyvała Džeroma Selindžera i Džonatana Fojera. Lubimaj kaviarniaj nazyvała homielski «Biskvit» na praśpiekcie Lenina za jaje ŭtulnaść.
Z padarožžaŭ sprabuje pryvieźci znački i tradycyjnyja mahniciki na chaładzilnik. Z padarožžaŭ joj spadabaŭsia Zahrab, za jaho maleńkija ŭtulnyja vułački.
«Baraćba nie žanočy vid sportu? Dy nie. Možna ž i chadzić nie z doŭhimi, ale akuratnymi pafarbavanymi paznohciami, pryhožaj pryčoskaj», — kazała jana ŭ adnym teleintervju.
A voś z sacyjalnych sietak Maryja Mamašuk pierad Alimpijadaj pradbačliva vydaliłasia.