Łahviniec prapanavaŭ Hubareviču duumvirat. Toj adkazaŭ: «Heta słabaja prapanova»
Kandydat na pasadu staršyni ruchu «Za svabodu» Aleś Łahviniec vystupiŭ z prapanovaj uvieści sustaršynstva ŭ arhanizacyi, kab całkam vyklučyć mahčymaść raskołu.
Łahviniec adznačyŭ, što ciapier u ruchu «Za svabodu» adbyvajecca dyskusija, jakaja «zbolšaha prachodzić u cyvilizavanych ramkach». Ale ŭ niekatorych siabraŭ ruchu jość aściarohi nakont budučyni arhanizacyi:
«Ruch — heta kaštoŭnaść dla nas usich. Usio ž taki jość roznyja razmovy pra toje, što jon moža razvalicca. Kab paźbiehnuć pahrozy razvału (u jakuju ja, darečy, nie vieru), kab pasprabavać budavać toje, dziela čaho šmat chto z nas stajaŭ na Płoščy, ja prapanoŭvaju, kab my ŭnieśli źmieny ŭ statut. Ja prapanoŭvaju, kab na pierachodny pieryjad ciaham dvuch hadoŭ my ŭviali sustaršynstva, dzie Juraś Hubarevič i ja źjaŭlajemsia sustaršyniami», — zajaviŭ Aleś Łahviniec na pres-kanfierencyi ŭ Miensku.
Łahviniec pry hetym papiaredziŭ, što jahonaja prapanova nie aznačaje, što jon zdymaje svaju kandydaturu z vybaraŭ staršyni ruchu «Za svabodu».
Juraś Hubarevič u kamientary Svabodzie zajaviŭ, što nie bačyć padstavaŭ padtrymać prapanovu Łahvinca ab sustaršynstvie:
«Ja liču, što heta słabaja prapanova pieradusim dla samoj arhanizacyi. Jana nie daść karyści ruchu, bo tak ci inakš budzie pradaŭžacca pieraciahvańnie kanatu. Na siońniašni dzień my abodva zajavili pra svoj namier vyjhrać, i nie baču sensu, čamu niechta pavinien sastupać. Tym bolš što i Aleś, i ja adnaznačna zajaŭlali, što budziem zastavacca ŭ ruchu. Ja vieru, što kožny strymaje svaje słovy i nijakaha raskołu možna nie bajacca», — kaža Hubarevič.
***
Vybary staršyni ruchu «Za svabodu» adbuducca na spravazdačna-vybarčaj kanfierencyi arhanizacyi, jakaja adbudziecca 16 kastryčnika ŭ Minsku.