Subotkin budzie siadzieć — ahučany prysud eks-hiendyrektaru CHK «Dynama-Minsk»
Sud vyrašyŭ, što były top-mieniedžar chakiejnaha kłuba budzie siadzieć.
Maksim Subotkin
Prakuror prasiŭ dla Subotkina 6 hadoŭ pazbaŭleńnia voli ŭ kałonii ŭzmocnienaha režymu. Plus — kanfiskavać majomaść. Sudździa Dźmitry Cykał amal zadavoliŭ jaho patrabavańni — Maksima Subotkina pryznali vinavatym pa ŭsich punktach. Jon praviadzie 5 hadoŭ u kałonii ŭzmocnienaha režymu, majomaść eks-dyrektara budzie kanfiskavana. Jamu zabaroniena zajmać pasady, źviazanyja z ažyćciaŭleńniem funkcyj pradstaŭnika ŭłady, arhanizacyjna-rasparadčych i (abo) administracyjna-haspadarčych paŭnamoctvaŭ.
Termin, jaki jon pravioŭ pad vartaj, pakul razhladali spravu pojdzie ŭ zalik. To bok siadzieć Subotkinu zastałosia trochi mienš za 4 hady. Prysud jašče nie ŭstupiŭ u siłu i moža być abskardžany.
Nahadajem, što Maksim Subotkin byŭ zatrymany ŭ lipieni 2015 hoda. Jaho abvinavačvali ŭ złoŭžyvańni słužbovymi paŭnamoctvami, što paciahnuła ciažkija nastupstvy ŭ vyhladzie naniasieńnia ŭronu ŭ asabliva bujnym pamiery i ŭ pieravyšeńni ŭłady abo słužbovych paŭnamoctvaŭ; u zavałodańni hrašovymi srodkami kłuba z vykarystańniem słužbovych paŭnamoctvaŭ.
Trochi paźniej, u žniŭni, byŭ zatrymany i hienieralny mieniedžar «Dynama» Uładzimir Bieražkoŭ, jakomu było vystaŭlenaje abvinavačvańnie ŭ zavałodańni hrašovymi srodkami kłuba z vykarystańniem słužbovych paŭnamoctvaŭ.
Bieražkoŭ i Subotkin kampiensavali škodu, spłaciŭšy amal 3 młrd rubloŭ, i paprasili vyzvalić ich ad kryminalnaj adkaznaści, źviarnuŭšysia z adpaviednym chadajnictvam da Łukašenki.
Subotkin pryznaŭ pryčynieńnie škody pa niekatorych, ale zajaviŭ, što nie mieŭ karyślivych metaŭ.
U śniežni 2015 hoda, znachodziačysia ŭ SIZA, jon padaŭ pazoŭ suprać minskaha «Dynama», adkul jon byŭ zvolnieny. Pazoŭ byŭ ab niepravamiernym zvalnieńni i spahnańni kampiensacyi. Ale sud pryniaŭ bok chakiejnaha kłuba.
6 krasavika 2016 hoda Bieražkovu źmianili mieru strymańnia z zaklučeńnia pad vartaj na padpisku ab niavyjeździe, i jon vyjšaŭ na volu. Maksim Subotkin zastaŭsia pad vartaj, ŭ pamiłavańni jamu admovili.