Biełstat namalavaŭ partret siaredniestatystyčnaha biełaruskaha mužčyny
U Biełarusi na 1 studzienia 2016 hoda naličvałasia 4 420,8 tys. mužčyn — 46,5% ad ahulnaj kolkaści nasielnictva, paviedamili ŭ Nacyjanalnym statystyčnym kamitecie.
Biełaruś naležyć da katehoryi krain, dzie na praciahu doŭhaha pieryjadu času kolkaść mužčynskaha nasielnictva mienšaja za kolkaść žanočaha, padkreślili ŭ Biełstacie.
Treba adznačyć, što chłopčykaŭ zaŭsiody naradžajecca bolš, čym dziaŭčynak (u 2015 hodzie źjaviłasia na śviet 61,3 tys chłopčykaŭ i 57,7 tys. dziaŭčat). Jak vynik, na 1 000 narodžanych chłopčykaŭ prypadała ŭsiaho 939 dziaŭčat. Pa miery staleńnia dyspraporcyja pamiž pałami vyraŭnoŭvajecca, i va ŭzroście 30-33 hadoŭ suadnosiny žančyn i mužčyn stanoviacca prykładna adnolkavymi, a potym pačynajuć składvacca na karyść žanočaha nasielnictva. U pažyłym uzroście nazirajecca najbolšaja dyspraporcyja. Tak, da 65 hadoŭ mužčyn stanovicca ŭ paŭtara raza mienš, čym žančyn, a da 74 hadoŭ — bolš čym u dva razy.
Siaredni ŭzrost mužčyn u Biełarusi — 37,3 hoda. Pryčym u haradach mužčynskaje nasielnictva značna maładziejšaje, čym u sielskaj miascovaści (siaredni ŭzrost haradžan — 36,2 hoda, viaskoŭcaŭ — 40,9 hoda). U ahulnaj kolkaści mužčyn 65,3% znachodziacca ŭ pracazdolnym uzroście, 15,6% — starejšyja za pracazdolny ŭzrost, 19,1% — maładziejšyja za pracazdolny.
Dziakujučy realizacyi dziaržaŭnych sacyjalnych prahram i palitycy ŭ halinie achovy zdaroŭja pavialičvajecca čakanaja praciahłaść žyćcia jak siarod žančyn, tak i siarod mužčyn. U 2015 hodzie hety pakazčyk u mužčyn skłaŭ 68,6 hoda, u žančyn — 78,9 hoda. Z 2005 hoda razryŭ u čakanaj praciahłaści žyćcia pamiž mužčynami i žančynami skaraciŭsia z 12,2 da 10,3 hoda.
U minułym hodzie ŭziali šlub 82 tys. mužčyn, ź ich upieršyniu stvaryli siamji 59,5 tys. Mužčyny addajuć pieravahu stvarać siemji va ŭzroście 25-29 hadoŭ (kožny treci mužčyna, jaki ŭziaŭ šlub) i 20-24 hadoŭ (kožny čaćviorty). U minułym hodzie z ahulnaj kolkaści žanichoŭ 1 263 biełarusy vybrali niaviestu z Rasii, 711 — z Ukrainy, 33 — ź Litvy, 20 — z Łatvii, 12 — ź Izraila.
Suśvietny dzień mužčyn adznačajecca ŭ pieršuju subotu listapada z 2000 hoda. Heta śviata — nahoda pryciahnuć uvahu hramadskaści da važnaści zachavańnia zdaroŭja mužčyn, a taksama da hiendarnaj roŭnaści pry vyznačeńni važnaści roli mužčyn u siamji i vychavańni dziaciej.