Turyscka-infarmacyjny centr Hrodna pačaŭ pracu ŭ Biełastoku
Turyscka-infarmacyjny centr, pryśviečany Hrodna i hrodzienskamu rehijonu, pačaŭ pracu ŭ budynku teatra opiery i fiłarmonii ŭ polskim Biełastoku. Pra heta paviedamiła namieśnica načalnika ŭpraŭleńnia sportu i turyzmu Hrodzienskaha abłvykankama Taćciana Lidziajeva, piša BiełTA.
«Tut žychary i hości Biełastoka zmohuć daviedacca ŭsiu nieabchodnuju infarmacyju pra turystyčny patencyjał Hrodna i vakolic, najbolš cikavyja turystyčnyja abjekty, atrymać kantakty turystyčnych firm, haścinic, inšych abjektaŭ śfiery pasłuh. Tut možna budzie ŭziać infarmacyjnyja buklety, turystyčnyja karty, inšuju drukavanuju pradukcyju, atrymać adkazy na ŭsie chvalujučyja turysta pytańni», — raspaviała Taćciana Lidziajeva. U infarmacyjnym centry taksama možna budzie va ŭsich padrabiaznaściach daviedacca pra paradak ujezdu i praviły znachodžańnia ŭ turyscka-rekreacyjnym parku «Aŭhustoŭski kanał» (u skład terytoryi ŭvajšli taksama Hrodna i častka Hrodzienskaha rajona), jaki z 26 kastryčnika zamiežnyja turysty mohuć naviedvać bieź vizy.
«Anałahičny centr, pryśviečany turyzmu ŭ Padlaskim vajavodstvie Polščy, pačaŭ pracu tydzień tamu ŭ Hrodnie. Stvareńnie takich centraŭ daść mahčymaść pryciahvać dadatkovych turystaŭ, ažyćciaŭlać sumiesnyja turystyčnyja pradukty», — padkreśliła Taćciana Lidziajeva.
Jana adznačyła rost cikavaści da rehijona z boku tak zvanych biaźvizavych turystaŭ. Pavodle danych na 2 listapada, dla naviedvańnia Biełarusi takim čynam zarehistravalisia amal 110 zamiežnikaŭ. Bolšaść ź ich — hramadzianie Polščy i Litvy, adnak siarod tych, chto ŭžo naviedvaŭ Hrodna bieź vizy, jość taksama žychary Francyi, Ispanii, Bielhii.