Jarmošyna na pachavańni byłoha sakratara Centrvybarkama Mikałaja Łazavika: Jon byŭ dušoj kamisii
Były sakratar Centralnaj kamisii pa vybarach i praviadzieńni respublikanskich refierendumaŭ Biełarusi Mikałaj Łazavik pachavany 7 listapada na Paŭnočnych mohiłkach pad Minskam, paviedamlaje BiełaPAN sa spasyłkaj na STV.
Mikałaj Łazavik. Fota sb.by
«Dušoj kamisii» nazvała Łazavika na cyrymonii raźvitańnia staršynia Centrvybarkama Lidzija Jarmošyna.
«Mikałaj Ivanavič byŭ čałaviekam vielmi adkrytym. I dla srodkaŭ masavaj infarmacyi jon byŭ skarbnicaj infarmacyi ź pieršych vusnaŭ, infarmacyi sumlennaj, infarmacyi, jakaja zaŭsiody była patrebna žurnalistam», — skazała ŭ intervju STV ministr infarmacyi Lilija Ananič.
«Jon byŭ vydatnym čałaviekam. Da taho ž vielmi vysokim prafiesijanałam, zaŭsiody byŭ dušoj vybarčaj kamisii. Ni adna surjoznaja praca, ni adna vybarčaja kampanija, pakul jon byŭ žyvy i ŭvachodziŭ u Centralnuju kamisiju, nie prachodziła bieź jaho aktyŭnaha ŭdziełu», — adznačyŭ namieśnik kiraŭnika Administracyi prezidenta Valeryj Mickievič.
Mikałaj Łazavik pamior 5 listapada paśla ciažkaj chvaroby na 66-m hodzie žyćcia. Ad pasady sakratara Centrvybarkama jon byŭ vyzvaleny 17 kastryčnika ŭkazam prezidenta.
Łazavik zajmaŭ pasadu sakratara CVK ad 2000 hoda. Ad 2006 hoda pa 2015-y znachodziŭsia ŭ śpisie asobaŭ, jakim byŭ zabaronieny ŭjezd u ES u miežach sankcyj.
Łazavik naradziŭsia ŭ 1951 hodzie ŭ vioscy Nieviniany Vilejskaha rajona Minskaj vobłaści. U 1972 hodzie skončyŭ Biełaruski instytut miechanizacyi sielskaj haspadarki, u 1993-m — Biełaruski dziaržaŭny ŭniviersitet, u 2000-m — Akademiju kiravańnia pry prezidencie, u 2003 hodzie — aśpiranturu pry Akademii kiravańnia. Kandydat ekanamičnych navuk.
Byŭ deputatam Viarchoŭnaha Savieta Biełarusi 13-ha sklikańnia, uvachodziŭ u kamisiju pa dziaržaŭnym budaŭnictvie i miascovym samakiravańni. U 1996 hodzie pastaviŭ podpis za impičmient Alaksandra Łukašenki, ale potym adklikaŭ svoj podpis i paśla kanstytucyjnaha refierendumu ab pašyreńni paŭnamoctvaŭ prezidenta pierajšoŭ u Pałatu pradstaŭnikoŭ pieršaha sklikańnia.