U Lidzie alfons «raźvioŭ» piensijanierku na hrošy, žančyna nie dažyła da suda
Paznajomilisia Maryja i Aleh (imiony źmienienyja pa etyčnych pryčynach) u internecie. Mužčynu było 35, žančynie — 65. Ale niahledziačy na roźnicu va ŭzroście, pamiž imi paŭstali ramantyčnyja adnosiny, pišuć Naviny.by sa spasyłkaj na hazietu «Pryniomanskija vieści».
Nieŭzabavie mužčyna pryjechaŭ da svajoj damy ŭ Lidu, raspavioŭ žałasnuju historyju pra toje, što žyvie ŭ Hrodnie z byłoj «hramadzianskaj» žonkaj. Raźjechacca nie mohuć, bo ŭ ich ahulnaje dzicia. Kazaŭ, što pracuje hruzčykam, tamu mała zarablaje.
Maryja ŭ adkaz raspaviała, što raźviedzienaja, dziaciej niama, raniej pracavała advakatkaj, a ciapier na piensii. Jana taksama pryznałasia, što ciažka chvoraja, tamu prasiła maładoha čałavieka nie budavać ź joj vialikich płanaŭ.
Sustrakacca jany stali ŭsio čaściej. Žančyna padoŭhu lažała ŭ balnicy ŭ Hrodna, dzie «kachany» jaje naviedvaŭ. Za taki kłopat Maryja nie škadavała hrošaj — daryła mužčynu darahija padarunki, potym aformiła vizu. Jon navat uhavorvaŭ jaje kupić sumiesny aŭtamabil i pradać kvateru ŭ Lidzie, kab jana zmahła pierabracca bližej da jaho ŭ abłasny centr. Dalej — bolš.
Žančyna padzialiłasia, što daŭno maryła trapić na Kubu. Pradprymalny prychilnik tut ža znajšoŭ «niedarahija» pucioŭki — za 2 tysiačy dalaraŭ, jakija jamu adrazu ž pieradała Maryja. Na nastupny dzień usia suma źnikła — ci to zhubiŭ, ci to skrali.
Paśla hetaha žycharka Lidy vyrašyła źviarnucca ŭ milicyju, niahledziačy na toje, što mužčyna ŭhavorvaŭ jaje zabrać zajavu. Krychu paźniej Maryja daviedałasia, što jana nie pieršaja achviara machlara. Da hetaha jon sprabavaŭ zakrucić raman za hrošy ź jašče adnoj žančynaj, na hety raz žycharkaj Vilni. Jana była ŭ jaho ŭ siabrach u sacsietkach.
U milicyi Aleh admaŭlaŭsia raspaviadać, jak vydatkavaŭ hrošy. Usie abvinavačvańni admaŭlaŭ. Kazaŭ, što byłaja pasija sprabuje takim čynam jamu adpomścić.
Hetaja historyja stała poŭnaj niečakanaściu dla «hramadzianskaj» žonki haradzienca. Jana dumała, što ŭ ich stabilnyja adnosiny. Svajho partniora žančyna charaktaryzavała tolki sa stanoŭčaha boku: nikoli nie pazyčaŭ ni ŭ koha hrošaj, nie piŭ i nie kuryŭ.
Sprava dajšła da suda. Mužčyna pryznany vinavatym u machlarstvie. Jamu pryznačyli pakarańnie ŭ vyhladzie dvuch hadoŭ «chimii». A Maryja da prysudu nie dažyła. Jana pamierła ad ciažkaha zachvorvańnia.