Kiraŭnik CRU: Rasija amal nie ŭdzielničaje ŭ vajnie suprać ID
Kiraŭnik CRU Majk Pampiea zajaviŭ, što ŭ Rasii niama płanaŭ pakinuć Siryju, što jaje ŭdzieł u vajnie suprać «Isłamskaj dziaržavy» minimalny i što jana budzie praciahvać umiašańnie ŭ spravy ZŠA. Rasijski MZS u adkaz zajaviŭ, što ździŭleny takimi vykazvańniami, paviedamlaje VVS.
Z šeraham zajavaŭ, jakija tyčacca Rasii, Pampiea vystupiŭ na forumie pa biaśpiecy ŭ Aśpienie, štat Kałarada — štohadovym mierapryjemstvie z udziełam pieršych asob krainy. Jon u čarhovy raz zajaviŭ, što ličyć, što Rasija ŭmiešvałasia ŭ vybary ŭ ZŠA, i nazvaŭ adnosiny dźviuch krain składanymi.
«Ja dumaju, u ich jość składanaści, ale ŭ toj ža čas jość i karysnyja dla kožnaha z bakoŭ momanty», — apisaŭ jon adnosiny Rasii i ZŠA.
Pampiea taksama zajaviŭ, što amal nie ŭbačyŭ dokazaŭ taho, što Rasija sapraŭdy maje ŭ Siryi zadaču baraćby z bajevikami ekstremisckaj arhanizacyi «Isłamskaja dziaržava». Udzieł Rasii ŭ vajnie ź ID jon nazvaŭ «minimalnym».
Na dumku šefa CRU, Rasija imkniecca zastacca ŭ Siryi tolki tamu, što joj padabajecca marski port Tartus z vychadam da Mižziemnamorja. Jon ličyć, što Rasiju pakul nielha nazvać sajuźnikam ZŠA ŭ Siryi, ale vykazaŭ nadzieju na toje, što krainy ŭsio ž zmohuć abjadnacca ŭ baraćbie z teraryzmam.
Pampiea dadaŭ, što jamu ciažka ŭjavić stabilnuju Siryju pry prezidenctvie Bašara Asada. Jon nazvaŭ Asada «maryjanietkaj irancaŭ», jakija, jak jon ličyć, tryvała atabarylisia ŭ Siryi.
Ministr zamiežnych spraŭ Rasii Siarhiej Łaŭroŭ, kamientujučy vykazvańni Pampiea, nazvaŭ ich vyklikajuć ździŭleńnie. U adkaz na słovy kiraŭnika CRU ab žadańni Rasii atrymać niezamiarzalny port u Mižziemnym mory ministr skazaŭ, što čytaŭ ab najaŭnaści ŭ ZŠA dziesiaci baz u Siryi.
«Atrymlivajecca, što spadar Pampiea choča taho ž, što i my ŭ Siryi. Tolki ŭ niekalki razoŭ bolš», — zajaviŭ Łaŭroŭ.
Jon dadaŭ, što zaŭsiody zychodziŭ z taho, što ŭ Siryi ŭ Rasii i ZŠA ahulnyja intaresy, a mienavita baraćba z hrupoŭkami, jakija pryznanyja terarystyčnymi, i mirnaje ŭrehulavańnie ŭzbrojenaha kanfliktu ŭ krainie.