Avijakampanija-bankrut Air Berlin spynić paloty z 28 kastryčnika
Niamieckaja avijakampanija-bankrut Air Berlin całkam spynić paloty ŭžo ŭ kancy kastryčnika. Pra heta paviedamiła siońnia ahienctva DPA sa spasyłkaj na list kiraŭnictva kancerna supracoŭnikam.
U im adznačajecca, što avijapieravozki, «pavodle danych na hety momant, niemahčyma budzie ažyćciaŭlać najpaźniej z 28 kastryčnika». Paloty «dočak» Air Berlin — Niki i LG Walter — buduć praciahvacca bieź źmien.
Kiraŭnictva avijakampanii nahadała, što ŭ bližejšy čaćvier, 12 kastryčnika, zakančvajecca termin pieramoŭ ab nabyćci padraździaleńniaŭ Air Berlin z kancernami Lufthansa i Easyjet. «U bližejšyja dni my budziem bolš viedać ab tym, što nas čakaje», — padkreślivajecca ŭ dakumiencie. U kampanii pryznali, što nie kožny supracoŭnik zmoža zachavać za saboj pracoŭnaje miesca.
15 žniŭnia druhi pa vieličyni avijapieravozčyk Hiermanii paviedamiŭ ab pačatku pracedury bankructva paśla taho, jak najbujniejšy akcyjanier — Etihad — vyrašyŭ spynić finansavuju padtrymku stratnaj kampanii. Kab zabiaśpiečyć pracu Air Berlin na adpuskny pieryjad, urad Hiermanii vydaŭ 15 žniŭnia avijapieravozčyku kredyt u pamiery 150 młn jeŭra. Hetych srodkaŭ, pavodle acenak Minekanomiki krainy, pavinna było chapić na try miesiacy, nieabchodnych dla pryniaćcia rašeńnia ab losie Air Berlin.
Drukujecca ŭ miežach śpiecyjalnaj rubryki «Naviny Hiermanii»