«Niekatoryja klijentki sami pazbaŭlajuć siabie cnoty, bo im strašna». Čamu važna razmaŭlać ź dziećmi pra seks
Seksołah Hanna Makijaviec z žacham zhadvaje, u jakim purytanstvie jaje vychoŭvali dziadula z babulaj i dzivicca, jak paśla takoha minułaha zdoleła nie syści ŭ manastyr i pabudavać zdarovyja adnosiny z mužčynam. Jana na ŭłasnym prykładzie tłumačyć, čamu važna pačać svabodna razmaŭlać ź dziećmi pra adnosiny pałoŭ jak maha raniej.
Hanna Makijaviec.
Daviedka: Hanna Makijaviec, seksołah. Paśla škoły pajšła vučycca na ekanamistku, ale chutka zrazumieła, što heta nie jaje. Vyvučaje hieštalt-terapiju ŭ Instytucie hieštaltu Ihara Pahodzina, zajmajecca seksałohijaj i praktyčnaj psichałohijaj. Ładzić ščyryja sustrečy #talkingaboutsex — svabodnyja razmovy na intymnyja temy. Adna ź bližejšych takich projdzie 18 lutaha — zarehistravacca možna pa spasyłcy.
— Usio majo dziacinstva mianie achoŭvali ad intymnaj temy. Mianie hadavali babula ź dziadulem, i dla ich navat doŭhija pacałunki ŭ sieryjałach byli nahodaj pieraklučycca na inšy kanał. Ja hublała nitku padziej sieryjała «Pavietranyja zamki» i ŭsio hadała, što ž prymušaje darosłych ludziej tak torhacca ŭ pošukach pulta i čyrvanieć?
Ujaŭlajecie ździŭleńnie/šok/žach majoj Hanny Piatroŭny, kali ŭ sšytku pa ałhiebry svajoj trynaccacihadovaj ŭnučki zamiest zadač jana ŭbačyła pozy z «Kamasutry», namalavanyja čarnilnaj asadkaj?
My abiedźvie da hetaha času nie možam zabyć toj dzień. Babula kryčała, što heta — soramna. Što ŭ 13 hadoŭ treba vučycca, a nie dumać pra takuju duraść. Soram, źviazany z hetaj temaj, jana ŭva mnie i raźviła…
U padletkavym uzroście, kab adharadzić mianie ad niejkich tearetyčnych ramantyčnych adnosin, babula ŭviała praviła: kožny dzień ja pavinna była viartacca dadomu ŭ 20.00. Chłopcaŭ u mianie nie było, ale z ustanoŭki svajakoŭ ja viedała, što kali ŭ mianie niechta i budzie, to pieršy partnior abaviazkova pavinien stać maim mužam. I nijak inakš.
Dzieści ŭ 10 hadoŭ mnie padaryli encykłapiedyju dla dziaŭčat, dziakujučy jakoj ja paźniej chacia b nie spužałasia pieršych miesiačnych (vy možacie nie pavieryć, ale ŭ mianie jość klijentki, jakija byli nastolki niepadrychtavanyja da hetaha dnia, što dumali — pamirajuć). Z knižki ja daviedałasia, što dziaŭčynki i chłopčyki składzienyja pa-roznamu, ale tak i nie zrazumieła, što takoje seks.
Babula rabiła ŭsio mahčymaje, kab ścierci z majoj hałavy hetaje saramlivaje słova, ale ŭ jaje nie atrymlivałasia. Dzie-nidzie ja vychoplivała pacałunki ŭ sieryjałach, bačyła abdymki na vulicach, čuła fantastyčnyja historyi ad siabrovak… Dziakuj bohu, što ja była hnutkaj u psichałahičnym płanie, inakš maju cikaŭnaść da svajoj seksualnaści i ludziej navokał zusim by padušyli. Imavierna, ja mahła b syści ŭ manastyr.
U 17 hadoŭ ja pačała pracavać aficyjantkaj i ŭ kafe, pa-za miežami chatniaha kantrolu, upieršyniu pačała sustrakacca z chłopcam. Viedajecie, hety tatalny kantrol pracavaŭ mnie zusim nie na karyść: vychodziačy z doma, ja adryvałasia napoŭnicu.
Kali svajaki daviedalisia, što ŭ mianie jość chłopiec, niejak za stałom jany spytali, ci karystajemsia my srodkami kantracepcyi. Vidać, jany dumali, što pra ŭsio heta ja musiła daviedacca sama adrazu paśla atrymańnia pašpartu. Što ž vy nie ŭzdymali hetuju temu raniej? — zadavałasia ja pytańniem.
Viedajecie, niekatorym maim klijentkam maci raskazvali žudasnyja historyi. Maŭlaŭ, pazbaŭleńnie cnatlivaści padobna na śmierć: stolki kryvi, byccam ciabie zabili i ty naradziłasia znoŭ. Paśla hetyja dziaŭčaty samastojna sprabavali pazbavić siabie cnatlivaści: tolki kab pierad partnioram nie było soramna za bol, za kroŭ.
I paśla z takich zapužanych asob biez narmalnaj seksualnaj adukacyi vyrastajuć zakampleksavanyja maci, dla jakich stanovicca prablemaj užo sa svaimi dziećmi pahutaryć pra masturbacyju.
Kaniečnie, siońnia ź internetam praściej: kali maci skazała, što pieršy seks — heta jak śmierć, to ty možaš pačytać forumy, vodhuki inšych žančyn i zrazumieć, što heta daloka nie tak i nie va ŭsich. Raniej chłopcy, jakija ŭ svoj pieršy raz paciarpieli niaŭdaču, praciahły čas nie mahli adyści ad masturbacyi: bajalisia, što z partniorami nie atrymajecca znoŭ. Ciapier kožny ź ich moža pačytać, što dla pieršaha razu niaŭdača — heta norma. I supakoicca. Adnak usio roŭna ništo nie zamienić žyvych dyjałohaŭ baćkoŭ i dziaciej, muža i žonki, partnioraŭ…
Tamu ja raju baćkam zahadzia padrychtavacca da intymnych pytańniaŭ ad dziaciej. Pieršaje, što ich zaŭsiody cikavić, źviazana z tym, adkul jany ŭzialisia. Nie treba vydumlać kazki pra busłoŭ, lepš adrazu idzicie ŭ kniharniu i nabudźcie ilustravanuju knihu (naprykład, Robi Charys «Davaj pahavorym pra HETA. Pra dziaŭčynak, chłopčykaŭ, niemaŭlat, siamju i cieła», dla bolš darosłych dziaciej padydzie knižka «Davaj parazmaŭlajem pra adnosiny» hetaha ž aŭtara), jakaja dapamoža raspavieści pra praces naradžeńnia ščyra, biez pryŭkrasaŭ.
Kali vy nie razhubiciesia ŭ pieršy raz, kali dzicia zrazumieje, što ŭsie jaho pytańni naturalnyja i niama čaho ich saromiecca, to z nastupnym pytańniem «čamu ŭ Kaci ŭ majtkach ŭsio nie tak, jak u mianie?» jano znoŭ pryjdzie da vas. I hetak dalej.
Anivodnaja krynica ŭ internecie nie zamienić davierlivyja adnosiny. Ščyry siamiejny dyjałoh, na moj pohlad, navat lepš za školnyja kursy pa seksualnaj adukacyi. Bo kali, naprykład, zhadać moj kłas, to ŭ 14 hadoŭ adny dziaŭčaty ŭžo zajmalisia seksam, a inšyja navat nie viedali, što takoje masturbacyja. Dy i nie cikava im było. Akramia taho, jość ža strohija, relihijnyja siemji…
Było b kruta, kali b u našych škołach isnavali dadatkovyja kursy seksualnaj adukacyi: zahadzia zajaŭlajecca tema (naprykład, kantracepcyja), i na zaniatki prychodziać usie, kamu cikava pasłuchać.
…Svajho muža ja sustreła, kali raźvitałasia z byłym chłopcam. Pamiataju, jak mnie było niajomka kazać, što jon u mianie nie pieršy: u hałavie ŭsio jašče siadzieła, što ŭ mužčyny ty pavinna być pieršaj i adzinaj. I, kaniečnie ž, vyjści za hetaha pieršaha zamuž. Pra toje, što možna padabacca inšym, mieć niejkija fantazii, i dumak nie było. Ale budučy muž tady adreahavaŭ spakojna, za što ja jamu vielmi ŭdziačnaja.
Ułasnuju seksualnaść ja jašče praciahvaju spaścihać. U žančyn uvohule całkam libida raskryvaje siabie tolki bližej da 30 hadoŭ. Heta chłopčyki ź dziacinstva viedajuć svajo cieła: ad čaho ŭzbudžajucca, sakrety razradki. Niekatoryja ž dziaŭčaty ŭ hetym uzroście navat nikoli nie razhladali ŭ lusterku, što ŭ ich znachodzicca nižej za pojas.
Ja prajšła ciarnisty šlach ad dziaŭčynki, na jakuju načapili mnostva purytanskich jarłykoŭ, da seksołaha, jaki moža dapamahać inšym z takimi ž prablemami. Usie vakoł zajmajucca seksam, naradžajucca dzieci, ale my čamuści tak mała pra jaho razmaŭlajem, heta ŭsio jašče tema-tabu. Čamu tak?
Navučyciesia razmaŭlać. Jak tolki vy pojdziecie partnioru nasustrač, jon padkaža vam, jakim niestandartnym sposabam možna padoŭžyć chviliny asałody. Vaša žančyna raskaža pra važnaść doŭhaj preludyi, rastłumačyć, što vilhotna — heta nie zaŭsiody značyć «možna». A dzieci buduć udziačnyja, kali vy skažacie im, što schiemy ŭ porna — nie zaŭsiody praŭda. Mnohija prablemy źniknuć sami saboj paśla frazy «nam treba pahavaryć».