Stvorany preparat, jaki pieraškadžaje zaražeńniu VIČ i błakuje jaho ŭ arhaniźmie chvoraha
Amierykanskija virusołahi raspracavali preparat, adzinkavaja doza jakoha padaŭlaje razmnažeńnie virusa ŭ arhaniźmie chvoraha na VIČ čałavieka na praciahu miesiaca, a taksama pieraškadžaje zaražeńniu VIČ zdarovaha čałavieka na praciahu dvuch tydniaŭ. Pra revalucyjnaje adkryćcio havorycca ŭ artykule, apublikavanym u časopisie Nature Communications.
Jak tłumačać navukoŭcy, siońnia chvoryja na VIČ mohuć pražyć dziasiatki hadoŭ dziakujučy pryjomu antyretravirusnych preparataŭ — rečyvaŭ, jakija padaŭlajuć razmnažeńnie virusa ŭ kletkach cieła. Ale jany časta majuć mocnyja pabočnyja efiekty, tamu miedyki časta vymušanyja spyniać ich pryjom na niekalki tydniaŭ. Adrazu paśla hetaha VIČ pačynaje intensiŭna kapijavać siabie.
U apošnija hady navukoŭcy aktyŭna sprabujuć znajści leki abo antycieły, jakija dapamahali b paźbiehnuć padobnaj «kontrataki» virusa ci dazvalali b «vyhnać» virus z kletak.
Aŭtar navukovaj pracy Hovard Hiendelman z univiersiteta Niabraski ŭ ZŠA i jaho kalehi raspracavali svojeasablivaje pramiežkavaje rašeńnie: jany zdoleli madyfikavać adzin z užo isnujučych preparataŭ, dałutehravir, takim čynam, što jaho malekuły praciahvali padaŭlać razmnažeńnie virusa ŭ arhaniźmie žyvioł na praciahu vielmi doŭhaha času.
Jak pakazali ekśpierymienty na myšach, nievialikaja doza nanačaścic, vyrablenych z atrymanaha rečyva, dušyć razmnažeńnie virusa va ŭžo zaražanych hryzunach na praciahu miesiaca i abaraniaje zdarovych žyvioł ad zaražeńnia VIČ na praciahu jak minimum dvuch tydniaŭ.
Atrymanaja navukoŭcami madyfikacyja dałutehravira pavysiła jaho aktyŭnaść u niekalki dziasiatkaŭ razoŭ i padoŭžyła čas žyćcia jaho malekuł ŭ arhaniźmie prykładna ŭ 5 razoŭ, što dazvoliła źnizić dozu lekaŭ, jakuju ŭvodzili ŭ arhanizm myšej.
Heta praktyčna całkam likvidavała ŭsie pabočnyja efiekty ad pryjomu preparatu i źniziła ŭzrovień jaho taksičnaści amal da nula, što, jak ličać aŭtary artykuła, daje ich nanačaścicam vialikija šancy na prachodžańnie kliničnych vyprabavańniaŭ i chutkaje trapleńnie ŭ miedycynskuju praktyku.