Maci ź Pinska buduć sudzić za zabojstva niemaŭlaci
U Pinsku skončyli rasśledavańnie kryminalnaj spravy pa abvinavačvańni 35-hadovaj žančyny ŭ zabojstvie novanarodžanaj dački, piša tut.by.
Złačynstva było ździejśniena 26 studzienia. A 18.30 bryhada chutkaj dastaviła abvinavačvanuju ŭ lakarniu z padazreńniem na vykidyš. Miedyki paviedamili pra zdareńnie pravaachoŭnikam i pa miescy žycharstva pacyjentki vyjechała śledča-apieratyŭnaja hrupa. Padčas ahladu kvatery śledčyja vyjavili ŭ jaje žanočaj sumačcy zahornuty ŭ pakiet trup novanarodžanaj dziaŭčynki z množnymi rankami i siniakami.
Jak vyśvietlili ekśpierty, dzicia naradziłasia danošanym i žyćciazdolnym, a śmierć nadyšła ŭ vyniku aśfiksii.
«Padčas papiaredniaha rasśledavańnia było vyśvietlena, što abvinavačanaja naniesła svajmu dziciaci nie mienš za 49 cialesnych paškodžańniaŭ. Paśla hetaha jana zakryła adtuliny rota i nosa i ścisnuła šyju dački, u vyniku čaho niemaŭla pamierła», - paviedamiŭ aficyjny pradstaŭnik upraŭleńnia Śledčaha kamiteta pa Bresckaj vobłaści.
Žančynie vystavili abvinavačvańnie ŭ zabojstvie zaviedama małoha dziciaci z asablivaj žorstkaściu. Pavodle kompleksnaj psichołaha-psichijatryčnaj ekśpiertyzy abvinavačanaja mahła ŭśviedamlać što robić i kiravać saboj.
Kryminalnaja sprava pieradadziena prakuroru dla nakiravańnia ŭ sud.