Achoŭniki pabili abaroncu Kurapataŭ, kab vysłužycca pierad Zajdesam
31-hadovy aktyvist AHP Dźmitryj Kavałhin raskazaŭ «NN», jak prachodziać dziažurstvy ŭ Kurapatach. U Kavałhina zdaryŭsia nie samy pryjemny momant z achovaj restarana «Pajedziem, pajadzim» 30 lipienia. U vyniku jon napisaŭ zajavu ŭ milicyju.
«Ja byŭ na vachcie ŭ Kurapatach u druhi raz. I pieršy raz amal uvieś čas stasavaŭsia i ź milicyjaj, i z administracyjaj. Tady ja zamoviŭ u restaranie «Pajedziem, pajadzim» butelku vady, a paśla paprasiŭ pakazać ich pažarny płan evakuacyi. Jany mnie adkazali, što ničoha nie źbirajucca pakazvać. Maŭlaŭ, my nie pavinny pakazvać, vy nijaki nie praviarajučy orhan. Ja vyrašyŭ pašukać sam, pajšoŭ pa restaranie. Paśla padbiehła administratarka, jakaja zakryčała, što ja pavodžu siabie nieadekvatna i jana vyklikaje milicyju. U čym nieadekvatnaść? Ja prosta turbujusia pra svaju biaśpieku.
Kali milicyja pryjechała, to ja ŭ adkaz napisaŭ na administratarku zajavu ab abrazie. Voś-voś užo musić być adkaz.
30 lipienia było čarhovaje dziažurstva AHP. Paniadziełak — dastatkova spakojny dzień. Ja stajaŭ u viečarovuju źmienu. Pazicyja našaj partyi — nie leźci na ražon, prosta davać ludziam infarmacyjnyja ŭlotki i adhavorvać ich jechać va ŭstanovu.
Ja ŭsio ž pasprabavaŭ zatarmazić adnu mašynu, mianie adrazu pasprabavaŭ šturchanuć achoŭnik. Ja daŭ jamu zrazumieć, što nie syjdu z hetaha miesca. Jon vyklikaŭ milicyju i mianie aštrafavali na adnu bazavuju vieličyniu za parušeńnie PDR.
Mnohija prychodziać u «Pajedziem, pajadzim» prosta z pryncypu, što, maŭlaŭ, patrebna tak rabić. Było niekalki aŭtamabilaŭ z rasijskimi numarami, jakija prajazdžajuć ź vializnaj chutkaściu i tarmoziać la samych noh. Kaniečnie ž, milicyja na heta nijak nie reahuje.
Ahułam u hety dzień było mieniej za dziesiać aŭtamabilaŭ. Było niekalki mašyn, jakija zajazdžali tudy litaralna na paru chvilin i adrazu vyjazdžali. Adnu mašynu my raźviarnuli, heta byŭ darahi «Leksus». My skazali, kab ludzi zadumalisia, atrymałasia začapić ich za dušu. Heta była cełaja siamja. Było vidać, što jany abmiarkoŭvali heta.
Kala 19:30 jechała čarhovaja mašyna. I ja navat nie zaŭvažyŭ, jak na mianie kinułasia adrazu dvoje achoŭnikaŭ, nalacieli zboku. Jany mianie litaralna źnieśli, mabyć, nie raźličyli siłu. Ja zhrupavaŭsia i zvaliŭsia la bampiera aŭtamabila. Ź jaho vychodzić sam spadar Leanid Zajdes. Pakul ja padymaŭsia, Zajdes prykryknuŭ na achoŭnikaŭ: «Ja ž skazaŭ, nikoha nie čapać».
Achoŭniki, vidać, pabačyli znajomuju mašynu i vyrašyli vysłužycca pierad načalnikam. U mianie niekalki drapin na plačach i ruce. Ja vyklikaŭ milicyju, raskazaŭ, jak usio było. Tam uvieś čas staić čałaviek z kamieraj, jaki ŭsio zdymaje. Aksana Alaksiejeva, jakaja dziažuryła razam sa mnoj, kaža, što akurat u toj samy momant jon advioŭ kamieru. Jašče adna kamiera, praŭda, jość na słupie. Kali nivodzin z hetych zapisaŭ nie zachavaŭsia, budzie nahoda pra niešta padumać.
Milicyja doŭha pałochała mianie, što ja mahu być pryciahnuty za chłuślivy danos. U mianie na toj čas navat nie było asabliva vidać paškodžańniaŭ, ale baleła. Ja źjeździŭ 31 lipienia ŭ Baraŭlanskuju balnicu, dyk pa novaj kvalifikacyi heta «cialesnyja paškodžańni, jakija nie pryviali da niepracazdolnaści». Heta ciahnie na administracyjnuju spravu.
Ja adznačyŭ, što niepasrednym śviedkam usiaho, što zdaryłasia, źjaŭlajecca suŭładalnik «Pajedziem, pajadzim» Leanid Zajdes. Pakul afarmlalisia ź milicyjaj, jon niekalki razoŭ vychodziŭ na vulicu, ja pytaŭsia, ci budzie jon śviedkam, na što atrymlivaŭ adkaz: «Usio jość na kamierach». Budziem spadziavacca, što sapraŭdy jość.
Tema Kurapataŭ niepasredna tyčycca majoj siamji. Ja nie viedaju, dzie pachavany moj pradzied Cichan Klimovič. Viedaju tolki, što dzieści ŭ Homielskaj vobłaści. U svoj čas jon byŭ zamožnym sielaninam, u 1932 hodzie admoviŭsia iści ŭ kałhas. Maju prababulu z babulaj ža sasłali na Sałavieckija vyspy. Ja nie viedaju, dzie lažyć moj pradzied, tamu jon dla mianie lažyć u Kurapatach», — raskazvaje Dźmitryj Kavałhin.