«Adzin – trymaŭ nalepku, inšy – namazvaŭ klej…»
…na samaklejnyja nalepki.
5 červienia ŭ Žłobinie (Homielskaja vobłaść) administracyjnaja kamisija rajonnaha vykanaŭčaha kamiteta pastanaviła aštrafavać Eduarda Zialankova – miascovaha maładziovaha aktyvista – za nalepki «Dastaŭ!». Adna žančyna z kamisii sprabavała davieści, što kali Eduard nie rasklejvaŭ nalepki, to, prynamsi, namazvaŭ na ich klej. Troje miascovych chłopcaŭ byli zatrymanyja milicyjaj i supracoŭnikami KDB i abvinavačanyja ŭ rasklejvańni nalepak z nadpisam «Dastaŭ!». Raniej štrafy ŭžo byli nakładzienyja na inšych z zatrymanych (my paviedamili ab hetym 26 traŭnia).
Raspaviadaje E. Zialankoŭ: «U pakazańniach inšych chłopcaŭ, jakija byli zatrymanyja, zapisana, što mienavita ja hetyja nalepki nie rasklejvaŭ. I pry zatrymańni ŭ mianie nalepak nie vyjavili. Toje ž samaje ja patłumačyŭ na pasiedžańni kamisii. Adnak učastkovy milicyjant śćviardžaŭ, što ja nibyta taksama ich kleiŭ.»
Staršynia kamisii A. Hubarevič skazaŭ, što pakazańni adnaho milicyjanta važniej, čym inšych asobaŭ, i kamisija pastanaviła aštrafavać 22-hadovaha navučenca technikuma na 62000 rubloŭ za «raspaŭsiud drukavanych vydańniaŭ, jakija vyrablenyja z parušeńniem vyznačanaha paradku i nia majuć vydavieckich dadzienych, źmiest jakich nakiravany na pryčynieńnie ŭronu dziaržaŭnamu i hramadzkamu paradku, pravam i zakonnym intaresam hramadzianaŭ».
Na mierkavańnie Eduarda, pra ŭzrovień pracy kamisii śviedčyć nastupny fakt. Chvilinaŭ praź 15 paśla pačatku razhladu spravy adna z kabietaŭ zajaviła: «Kožny ź ich vinavaty: adzin trymaŭ nalepku, druhi – pendzal, treci – namazvaŭ klej.» Eduardu daviałosia adkazać, što kali b žančyna bolš uvažliva aznajomiłasia z materyjałami spravy, jana b zaŭvažyła, što nalepki byli samaklejnyja.
Telman Maślukoŭ