Traich palakaŭ sudziać za padpał Sajuza vienhraŭ u Zakarpaćci pa zadańni rasijskich śpiecsłužbaŭ
Mazaviecki adździeł Nacyjanalnaj prakuratury Polščy pieradaŭ u sud materyjały spravy suprać troch hramadzian krainy, jakija na pačatku lutaha 2018 hoda arhanizavali i ŭčynili padpał budynku Sajuza vienhraŭ u Užharadzie, pieradaje «Jeŭrapiejskaja praŭda» sa spasyłkaj na TVP.info.
Fota: facebook/sergii.knyazev
Padsudnych abvinavačvajuć ŭ teraryźmie. Pavodle śledstva, jany atrymali za padpał pa 1000 złotych (bolš za $250) ad zakazčyka — niamieckaha žurnalista, jaki, chutčej za ŭsio, dziejničaŭ pa zadańni śpiecsłužbaŭ Rasii.
«Heta była pravakacyja, jakaja pavinna była pryvieści da paharšeńnia ŭkrainska-vienhierskich adnosin. Heta było na ruku Rasii, jakaja zacikaŭlena ŭ destabilizacyi svajho zachodniaha susieda, dzie ŭžo idzie hibrydnaja vajna na Danbasie», — adznačyŭ aficer polskich śpiecsłužb, jaki vioŭ spravu.
Hałoŭnym padazravanym pa spravie źjaŭlajecca 28-hadovy Michał P., jaki maje vyšejšuju adukacyju i źjaŭlajecca śpiecyjalistam u śfiery biaśpieki. Jon źviazany ź nieafašystskaj arhanizacyjaj Falanga i prarasijskaj partyjaj Zmiana, lidar jakoj Maryjuš P. ŭžo treci hod znachodzicca ŭ śledčym izalatary — jaho padazrajuć u supracoŭnictvie z rasijskaj i kitajskaj vyviedkami.
Śledčyja ličać, što Michał P. zavierbavaŭ jašče dvuch palakaŭ Adryjana M. i Tomaša Š., daŭ im hrošy na zapalnuju sumieś, a taksama mabilnyja telefony, sim-karty i kurtki. Złamyśniki pavinny byli zapisać na videa padpał i pierasłać jamu, što aznačała b vykanańnie zadańnia.
Michał pavinien byŭ pryciahnuć da ździajśnieńnia hetaha złačynstva nibyta piać čałaviek. Jon admoviŭsia pryznavać vinu. Adnak supracoŭničać sa śledstvam pahadziŭsia 22-hadovy elektryk Adryjan. Jon raspavioŭ, što padčas adnoj z sustreč Michał paprasiŭ jaho namalavać na fasadzie Tavarystva vienhierskaj kultury Zakarpaćcia u Užharadzie svastyku i znak «88», jaki simvalizuje łozunh «Heil Hitler». Pavodle zadumy arhanizataraŭ, heta pavinna było ukazać na dziejańni «ŭkrainskich banderaŭcaŭ».
Pierad hetym Adryjan 13 studzienia pierasiok polska-ŭkrainskuju miažu, pravieryŭšy, ci nie budzie ŭ jaho prablem na miažy. Pierakanaŭšysia, što ŭsio prajšło narmalna, Michał pačaŭ płanavać apieracyju, zavierbavaŭšy taksama 26-hadovaha pierakładčyka Tomaša, jaki pavinien byŭ źniać padpał na videa.
Pierad pajezdkaj u Užharad jon pieradaŭ zmoŭščykam 500 jeŭra na vykanańnie zadańnia, paviedamiŭšy: «Heta hrošy ad vuhorcaŭ», choć pavinien byŭ skazać pra «zakazčyka ź ES», jak vynikaje z materyjału.
Abodva złamyśniki 3 lutaha adpravilisia va Ukrainu praz polska-słavackuju miažu, pakinuŭšy svaje telefony doma i uziaŭšy ŭ Užharad tyja, jakija atrymali ad Michała, havorycca ŭ materyjale.
Unačy 4 lutaha złamyśniki namalavali na ofisie Sajuza vienhraŭ «88» i kinuli ŭ raźbitaje akno butelku z zapalnaj sumieśsiu, jakaja adnak nie zaharełasia. Dasłaŭšy videa złačynstva, jany atrymali ad Michała adkaz, što «vienhry nie zadavolenyja, i było b dobra lepš zakapcić ścianu».
Praz try hadziny złamyśniki znoŭ źjavilisia na miesca złačynstva i zapichnuli namočanuju bienzinam kurtku adnaho ź ich u raźbitaje akno. Paśla hetaha złačyncy atrymali na telefon adkaz «OK».
U toj ža dzień jany vyjechali z Ukrainy ŭ Polšču. Jak adznačaje vydańnie, złamyśniki vydalili kampramat z telefonaŭ.
Adnak u pole zroku ŭkrainskich pravaachoŭnikaŭ jany patrapili dziakujučy kamieram nazirańnia, u tym liku na AZS, dzie jany kuplali kanistru ź bienzinam, a taksama ŭ adnym z Užharadskich chostełaŭ.
Paśla viartańnia ŭ Krakaŭ jany atrymali ad Michała svaje asabistyja telefony i hrošy za vykananuju pracu.
Praź niekalki tydniaŭ, 22 lutaha złamyśnikaŭ zatrymała polskaja śpiecsłužba.
Staršynia Zakarpackaj dziaržadministracyi Hienadź Maskal raniej paviedamlaŭ, što padpał ofisa Sajuza vienhraŭ na pačatku lutaha minułaha hoda učynili dvoje hramadzian Polščy: žychar Krakava Adryjan Marhleŭski i žychar Bydhošča Tomaš Šymkaviak.