Voŭk, jaki napaŭ na ludziej u Stoŭbcach, byŭ šalonym. U horadzie abvieščany karancin na dva miesiacy
U Staŭbcoŭskaj rajonnaj vietstancyi TUT.BY raspaviali, što voŭk, jaki pakusaŭ ludziej u horadzie, byŭ šalonym. U Stoŭbcach i vioscy Słabada ŭviedzieny karancin na dva miesiacy. Mienavita ŭ hetych miescach zafiksavali kantakt z žyviołaj. U Stoŭbcach vaŭka vyjavili na ŭskrainie horada.
U niadzielu, 27 studzienia śpiecyjalisty abyšli ludziej, kab vyjavić inšyja kantakty z vaŭkom. Zaraz va ŭzmocnienym režymie prachodzić vakcynacyja chatnich sabak i katoŭ ad šalenstva. Staŭbcoŭskaja haradskaja učastkovaja vietlakarnia pracuje da 20.00, a nie da 17.00, jak raniej. Čas pracy pavialičyli, kab ludziam było zručniej pryvozić žyvioł dla vakcynacyi.
Nahadajem, viečaram 26 studzienia kala 23.00 u milicyju Stoŭbcaŭ pastupiła adrazu niekalki paviedamleńniaŭ pra vaŭka. U rajonnuju balnicu źviarnulisia čatyry čałavieki: niepadalok ad čyhunačnaj stancyi spačatku voŭk napaŭ na mužčynu i žančynu, zatym u hetym ža rajonie — jašče na adnu paru minakoŭ. U paciarpiełych miedyki zafiksavali šmatlikija ŭkusy.
Milicyja vyjechała na pošuk žyvioły, i litaralna praź niekalki chvilin pastupiła paviedamleńnie ad miascovaha žychara — na vulicy 17 Vieraśnia voŭk staŭ kidacca na jaho aŭtamabil.
Žyviołu zastrelili.
Vypadki, kali zdarovy dziki voŭk vyjšaŭ da ludziej u horad, vielmi redkija. Praktyčna ŭsie padobnyja fakty ahresii vaŭka ŭ adnosinach da čałavieka ŭ bujnych nasielenych punktach adzinkavyja, i ŭsie jany tłumačylisia šalenstvam.