Čarnasociency i Hajdukievič-małodšy abrynulisia na anarchista Dziadka i deputatku Anisim praz publikacyi pra čačencaŭ
Na praciahu 2017 i 2018 hadoŭ u haziecie «Novy čas» vyjšła sieryja publikacyj Mikoły Dziadka pra dziejačaŭ Čačenskaj respubliki Ičkieryja. U pryvatnaści, źjavilisia publikacyi pra Džachara Dudajeva, Šamila Basajeva, Chamzata Hiełajeva, Zielimchana Jandarbijeva i inšych.
Mikałaj Dziadok. Fota spring96.org.
Mikałaj Dziadok — aktyvist anarchisckaha ruchu. U 2011 jon byŭ prysudžany da 4,5 hoda źniavoleńnia za šerah atak na administracyjnyja budynki ŭ Minsku. Tady byli atakavanyja pasolstva Rasii, Pałac prafsajuzaŭ, Ministerstva abarony. Dziadok byŭ pryznany palitviaźniem. Na volu vyjšaŭ pa rašeńni Alaksandra Łukašenki ŭ 2015 hodzie.
Publikacyi Dziadka vyjšli dastatkova kamplimientarnymi. Udzielniki zmahańnia za niezaležnaść Čačni paŭstajuć ź ich sapraŭdnymi hierojami. Voś što, naprykład, jon pisaŭ pra Šamila Basajeva: «Jon pakinuŭ kryvavy śled u rasijskaj historyi, chacia da kryvažernaści tych, z kim jon zmahaŭsia, jamu było daloka».
«Siońnia Zielimchan Jandarbijeŭ — adzin z čarhovych antyhierojaŭ rasijskaj prapahandy, naroŭni z Šamilem Basajevym, Džacharam Dudajevym, Rusłanam Hiełajevym i inšymi lidarami čačenskaha supracivu. Prapahandysckaja mašyna ludažernaj dyktatury Kadyrava zdymaje ab im siužety, u paraŭnańni ź jakimi «Žalezam pa škłu» prosta adpačyvaje», — piša Dziadok.
Hetyja publikacyi vyklikali šał u čarnasocienskaha sajta, jaki redahuje były supracoŭnik Administracyi prezidenta Leŭ Kryštapovič. «Užo dva hady padviedamasnaja Anisim hazieta prapahanduje teraryzm», — pišuć čarnasociency.
Pryčym tut Anisim? Sprava ŭ tym, što zasnavalnikam «Novaha času» źjaŭlajecca Minskaja haradskaja arhanizacyja TBM. Tut i spracavała łohika: maŭlaŭ, kali TBM, to vinavataja Anisim. Padobnaj łohikaj karystaŭsia i biznesoviec Arkadź Izrailevič, jaki potym prasiŭ u Anisim vybačeńnia. Nijakaha dačynieńnia da redakcyjnaj palityki «Novaha času» deputatka Pałaty pradstaŭnikoŭ Alena Anisim nie maje.
Čarnasociency aburanyja: jak možna pisać niešta dobraje pra ludziej kštałtu Dudajeva, kali jany prynieśli tolki vajnu i terakty? Jany pačali iranizavać, moža, i IDzIŁ dla «Novaha času» — zmahary z rasijskim impieryjalizmam.
Moža, na hetaj nievialikaj publikacyi ŭsio b i skončyłasia, ale «Pres-słužba parłamienta Čačenskaj respubliki Ičkieryja» padziakavała na svaim sajcie Alenie Anisim i «Novamu času» za publikacyi. Heta vyklikała novuju chvalu abureńnia.
U vyniku čarnasociency zajavili, što źviarnulisia ŭ MUS, Hienieralnuju prakuraturu i Ministerstva infarmacyi, kab jany razhledzieli publikacyi «NČ» na pradmiet apraŭdańnia prapahandy mižnarodnaha teraryzmu, a taksama raspalvańnia mižnanacyjanalnaj varažniečy i nianaviści.
«Mianie ŭsia hetaja situacyja nie stolki aburaje, kolki hniacie. U Sajuznaj dziaržavie, u respublikanskaj haziecie (nie ŭ fihavym listku!) mahčyma publikavać pa-sapraŭdnamu žyviolna-rusafobskija materyjały. Heta kraj. Dno», — pisaŭ niechta Ihar Arłovič.
«Kali dziaržaŭnyja orhany Respubliki Biełaruś nie daduć nijakaha adkazu, heta budzie aznačać tolki adno: nacyjanalisty atrymali kart-błanš na dehumanizacyju ruskich», — praciahvaje toj ža aŭtar.
Sproby niekatorych sajtaŭ, jak, naprykład «Biełaruskaha partyzana», rastłumačyć, što Anisim nie maje dačynieńnia da publikacyj, pośpiechaŭ nie mieli. Chutčej, naadvarot, jašče bolej razzadoryli čarnasociencaŭ.
Potym padciahnuŭsia namieśnik staršyni ŁDPB Aleh Hajdukievič, jaki ŭ kamientary tamu samamu čarnasocienskamu sajtu zaznačyŭ: «Publikacyi artykułaŭ, jakija ŭschvalajuć čačenskich terarystaŭ, u haziecie «Novy čas» niedapuščalnyja. Jość toje, što vidavočna dla kožnaha narmalnaha čałavieka ŭ śviecie. Toje, što abjadnoŭvaje ŭsich niezaležna ad palityčnych pohladaŭ. Teraryzm — heta miortvyja dzieci i žančyny, heta kroŭ i hvałt. Teraryzm — heta absalutnaje zło. Jaho nielha apraŭdać, jaho nielha zrazumieć. Apraŭdvać čačenskich terarystaŭ — toje ž samaje, što apraŭdvać IDzIŁ i fašyzm. Zrazumieć i apraŭdać heta niemahčyma».
Nie adstaŭ ad Hajdukievič i lidar Respublikanskaj partyi pracy i spraviadlivaści Vasil Zadniaprany. «Tavarystva biełaruskaj movy» pierachodzić usie miežy. Jaje vydańnie «Novy čas» pabłytała mety. Zamiest raźvićcia movy prapahandujuć ekstremizm i ŭchvalajuć baraćbu z Rasijaj. Užo Banderu i Dudajeva ŭ hieroi zapisali. Moža i za Chatyń Vasiuru orden dać? Čamu maŭčać Anisim i Mininfarm?» — zadajecca pytańniami tavaryš Zadniaprany.
Praź niejki čas da biełaruskich čarnasociencaŭ dałučylisia i rasijskija infarmacyjnyja resursy. Naprykład, sumnaviadomy «Rehnum» navinu pra vyłučeńnie Aleny Anisim kandydatam u prezidenty adreahavaŭ tak: «Apałahiety teraryzmu zajavili pra prezidenckija ambicyi».
Niešta padobnaje stali pisać i sajty kštałtu «Impieryi», «Imchakłaba», «Jeadejli», «Svabodnaja presa».
Sam Mikałaj Dziadok na svajoj staroncy ŭ fejsbuku patłumačyŭ, što nie padtrymlivaje akcyi suprać cyvilnych hramadzianaŭ, jakija ŭčyniali čačenskija paŭstancy, adnak padkreślivaje, što čačency ŭ toj vajnie byli bokam, jaki abaraniajecca, a nie nastupaje.
«Tak, ja liču hierojami Šamila Basajeva, Rusłana Hiełajeva i šerah inšych dziejačoŭ čačenskaha supracivu. I toj fakt, što ja nie padzialaju ich palityčnyja pohlady i nie ŭchvalaju častku ich dziejańniaŭ, nijak nie prymianšaje ich hieraizmu», — adznačaje Dziadok.