Syn Franca Klinceviča, uznaharodžany za anieksiju Kryma, uspłyŭ pamočnikam Babiča ŭ Biełarusi
U rasijskim pasolstvie ŭ Minsku pieršym sakratarom pracuje Andrej Klincevič — syn rasijskaha palityka Franca Klinceviča.
Andrej Klincevič
Franc Klincevič naradziŭsia ŭ biełaruskich Ašmianach, ale padčas słužby na terytoryi Rasii adčuŭ siabie ruskim. Kali pačytać jahonyja vystupy, to składvajecca ŭražańnie, što jon zaŭsiody prahnie vajny.
Čytajcie taksama. Rasijski sienatar Klincevič, uradženiec Biełarusi: Charvaty zaŭsiody byli zdradnikami słavianskaha śvietu
Franc Klincevič słužyŭ u Afhanistanie i paśla ŭznačaliŭ adzin ź vieteranskich sajuzaŭ. U rasijskim parłamiencie jon zasiadaŭ z 1999 da 2015 hadoŭ, pryčym adnojčy bałatavaŭsia ad Čačni. Paśla byŭ členam Savieta fiederacyi ad Smalenskaj vobłaści.
Syn Franca — Andrej, taksama pačynaŭ karjeru vajskoŭcam, jak i baćka — słužačy ŭ desancie.
Praz traŭmu śpiny syšoŭ sa słužby, ale, zdajecca, nie kančatkova: ukrainskija ŚMI nieadnojčy zhadvali jaho ŭ niehatyŭnych kantekstach i adznačali častyja vizity na akupavanuju terytoryju Kryma i na Danbas.
Andrej Klincevič trapiŭ u bazu «Miratvorca» jak asoba, datyčnaja da złačynstvaŭ na terytoryi Ukrainy.
Z ruk Pucina jon atrymaŭ hramatu jak čałaviek, jaki asabliva adznačyŭsia ciaham krymskaj kampanii.
Apošnija hady Klincevič-małodšy pracavaŭ razam ź Michaiłam Babičam (ciapierašnim pasłom u Biełarusi) u aparacie pradstaŭnika prezidenta Rasii ŭ Pryvołžskaj fiederalnaj akruzie.
Niepasredna pierad pryjezdam u Biełaruś Andrej Klincevič zajmaŭsia kuratarstvam «vajenna-patryjatyčnych kłubaŭ «Adzinaj Rasii». U Biełarusi jon užo paśpieŭ adznačycca vizitam da hrodzienskich kadetaŭ z metaj «naładžvańnia ščylnaha ŭzajemadziejańnia pamiž biełaruskimi i rasijskimi kadetami».
Klincevič u Hrodnie, druhi źleva. Fota: kadetgrodno.schools.by