Aficyjnaja statystyka: u lutym rabotniki 240 pradpryjemstvaŭ pracavali niapoŭny tydzień
Heta 145,5 tys. čałaviek.
U lutym rabotniki 240 biełaruskich pradpryjemstvaŭ i arhanizacyj pracavali ŭ režymie niapoŭnaj zaniataści abo byli vymušany iści ŭ adpačynki pa inicyjatyvie najmalnikaŭ.
Takija źviestki abnarodavaŭ na bryfinhu 5 sakavika ŭ Minsku namieśnik ministra pracy i sacyjalnaj abarony Piotr Hrušnik.
Pavodle jaho infarmacyi, u Bresckaj vobłaści naličvałasia 44 takija pradpryjemstvy, u Viciebskaj — 25, u Homielskaj — 43, u Hrodzienskaj — 40, u Minskaj — 34, Mahiloŭskaj — 54.
Ahulnaja kolkaść pracaŭnikoŭ na ich składała 145,5 tys. čałaviek.
Dola rabotnikaŭ, zaniatych u režymie niapoŭnaha pracoŭnaha času, ad kolkaści ŭsich rabotnikaŭ na hetych pradpryjemstvach vahałasia ad 14,4% u Minskaj vobłaści da
44,4% — u Mahiloŭskaj.Dola rabotnikaŭ, jakija znachodzilisia ŭ vymušanych adpačynkach pa inicyjatyvie najmalnikaŭ, varjiravałasia ad 1,9% u Hrodzienskaj vobłaści da 17,9% — u Homielskaj.
Jak zajaviŭ P.Hrušnik, pradastaŭleńnie pa inicyjatyvie najmalnikaŭ adpačynkaŭ, skaračeńnie pracoŭnaha času treba razhladać jak antykryzisnyja miery, hnutkija formy zaniataści nasielnictva i instrumient rehulavańnia biespracoŭja. Pavodle jaho słoŭ, hetyja miery «nakiravany na zachavańnie pracoŭnych kalektyvaŭ», heta — prajaŭleńnie «sacyjalnaj adkaznaści da supracoŭnikaŭ».
Razam z tym, zaznačyŭ namieśnik ministra, pavieličeńnie abjomaŭ nieefiektyŭnaha vykarystańnia pracoŭnaha času na vytvorčaści — heta patencyjalnaja baza dla rostu biespracoŭja i ŭźniknieńnia sacyjalnaj napružanaści ŭ hramadstvie.
Kantralujučy situacyju, Minpracy razam ź inšymi zacikaŭlenymi ministerstvami i viedamstvami pravodzić manitorynh situacyi na rynku pracy. U vypadku jaje dalejšaha paharšeńnia ministerstva hatova da karekciroŭki prahramy zaniataści na 2009 hod. U pryvatnaści, mahčyma bolš aktyŭnaje sadziejańnie zaniataści nasielnictva i pieraraźmierkavańnie z hetaj metaj finansavych resursaŭ.
U jakaści mier pa ŭzmacnieńni sadziejańnia zaniataści Hrušnik nazvaŭ: arhanizacyju apłačvanych hramadskich rabot; akazańnie sadziejańnia ŭ raźvićci pradprymalnickaj dziejnaści biespracoŭnych; prafiesijnuju padrychtoŭku, pierapadrychtoŭku i pavyšeńnie kvalifikacyi biespracoŭnych; padtrymku za košt biudžetnych pazyk arhanizacyj, jakija zachoŭvajuć i stvarajuć pracoŭnyja miescy; raźvićcio sistemy subsidavańnia pracoŭnych miescaŭ; častkovuju kampiensacyju raschodaŭ najmalnikaŭ pa apłacie pracy rabotnikaŭ.
Pa acency Minpracy, pry pavyšeńni ŭzroŭniu biespracoŭja da 2—3% zapatrabujucca dadatkovyja biudžetnyja asihnavańni ŭ pamiery 12 młrd. rubloŭ. Pakul na realizacyju prahramy zaniataści ŭ 2009 hodzie namiečana vydzielić 151 młrd. rubloŭ.