«Ich žyćciu ničoha nie pahražaje». MUS raskazała pra supracoŭnikaŭ, na jakich napali ŭ Vierchniadźvinsku
Ranicaj 1 studzienia ŭ Viciebskaj vobłaści zatrymali 18-hadovaha chłopca, jaki napaŭ na milicyjantaŭ z nažom. Niezadoŭha da incydentu małady čałaviek apublikavaŭ svoj manifiest.
- Supracoŭnikaŭ milicyi dastaŭlali ŭ balnicu, im była akazana nieabchodnaja miedycynskaja dapamoha. Na siońniašni momant ich zdaroŭju i žyćciu ničoha nie pahražaje, - prakamientavaŭ tut.by aficyjny pradstaŭnik MUS Viktar Novikaŭ.
Spravaj ŭžo zajmajecca Śledčy kamitet i ŭ bližejšy čas jon apublikuje infarmacyju.
Nahadajem, nočču ŭ Viciebskaj vobłaści pry zatrymańni 18-hadovy małady čałaviek nanios milicyjantam nažavyja ranieńni. Padrabiaznaści incydentu byli apublikavanyja ŭ sacsietkach: chłopiec kinuŭ butelku z zapalnaj sumieśsiu na terytoryju Vierchniadźvinskaha adździaleńnia Departamienta achovy MUS, a pry zatrymańni akazaŭ supraciŭ. Aficyjnych paćvierdžańniaŭ hetamu niama.
31 śniežnia na YouTube byŭ apublikavany rolik, u jakim małady čałaviek, jaki nazvaŭsia Hlebam T., kaža: «Kali vy hladzicie heta videa, to, chutčej za ŭsio, ja ździejśniŭ napad na Vierchniadźvinski RAUS». U videa jon nie tłumačyć pryčyny svajho ŭčynku, adpraŭlajučy usich u svoj Telegram-kanał. U jaho TH-kanale apublikavany šmatstaronkavy manifiest, u jakim jon tłumačyć svaje matyvy.