Stefanovič: Kidać kaktejl Mołatava niebiaśpiečna dla hramadstva, ale prysud palityčna matyvavany
12 lutaha dvoje maładych anarchistaŭ atrymali pa 7 hadoŭ kałonii ŭzmocnienaha režymu. 19-hadovych Mikitu Jemieljanava i Ivana Komara pakarali za kidańnie lampačak z farbaj u ścianu Minskaha haradskoha suda i kaktejl Mołatava, jaki jany kinuli ŭ budynak Vaładarki (ale ničoha nie zaharełasia).
Fota N. Bužan
Pakarańnie vielmi žorstkaje, uličvajučy jašče i sumy škody: pafarbavać ścianu suda kaštavała kala 150 rubloŭ, a pačyścić dźviery Vaładarki — uvohule 1,5 rubla.
Ci buduć pravaabaroncy pryznavać anarchistaŭ palitviaźniami?
Prysud prakamientavaŭ «viasnoviec» Valancin Stefanovič:
«Biezumoŭna, pravaabaroncy jašče buduć abmiarkoŭvać hety prysud.
Ale voś maja asabistaja pazicyja. Vykazvać pratest u takoj formie, u jakoj zrabili chłopcy, — to bok, kidać kaktejl Mołatava — učynak, u jakim jość pytańnie hramadskaj niebiaśpieki.
Ale jość taksama pytańnie praparcyjnaści pakarańnia za ŭčynak Komara i Jemieljanava. 7 hadoŭ za toje, što jany ździejśnili, uličvajučy minimalnuju škodu… Praciahłaść źniavoleńnia vidavočna nieadekvatnaja i niepraparcyjnaja złačynstvu.
Tamu jość padstava kazać pra palityčna matyvavany charaktar pieraśledu, jaki vyražajecca jakraz u nieadekvatnaści prysudu. Jość padstava patrabavać pierahladu prysudu z prytrymlivańniem pravoŭ na spraviadlivaje sudovaje raźbiralnictva.
Kažučy prosta, jany mahli b być pakaranyja biez pazbaŭleńnia voli.
Situacyja z Komaram i Jemieljanavym padobnaja da historyi z babrujskimi anarchistami (Vaśkovič, Syramałotaŭ), jakija atrymali pa 8 hadoŭ źniavoleńnia. Tady pravaabaroncy paličyli, što palityčny matyŭ u suvorym pakarańni byŭ. Niešta padobnaje adbyłosia i siońnia».