Novaja Ziełandyja lehalizavała aborty
Parłamient Novaj Ziełandyi pryniaŭ zakon ab lehalizacyi abortaŭ. Adpaviednaja zajava ministra justycyi Endru Litła apublikavana na sajcie ŭrada krainy.
«Bolš za 40 hadoŭ abort źjaŭlaŭsia adzinaj miedycynskaj praceduraj, jakaja ličyłasia złačynstvam u Novaj Ziełandyi. Ciapier aborty buduć spraviadliva razhladacca jak miedycynski vypadak», — havorycca ŭ zajavie.
Fota Artur Tumasjan, unsplash.com.
Pa słovach Endru Litła, novy zakon daść mahčymaść zabiaśpiečyć svoječasovuju kansultacyju i lačeńnie dla ŭsich žančyn, jakija advažylisia na hetuju praceduru. Jon dadaŭ, što žycharki Novaj Ziełandyi na praciahu dziesiacihodździaŭ damahalisia prava rabić aborty.
Jak paviedamlaje vydańnie New Zealand Herald, zakon byŭ pryniaty nacyjanalnym parłamientam u trecim čytańni z 68 hałasami za i 51 hołasam — suprać. Ciapier dakumient budzie pieradadzieny hienierał-hubiernataru Novaj Ziełandyi dla atrymańnia karaleŭskaj sankcyi.