Ideołah centru etnakasmałohii «Kryuja» prapanuje novy nacyjanalizm
Zapis u błohu kryviec.livejournal.com trapiŭ u Top30 na Jandeksie.
Zapis u błohu kryviec.livejournal.com trapiŭ u Top30 na Jandeksie.
Siaredniaviečny ład nie adnavić, hetaksama jak nie viernieš damadernuju tradycyjnuju supolnaść. Jakaja nijakaja, chaj kvołaja, ale biełaruskaja nacyja isnuje i z hetym treba ličycca, jak i z tym, što kłasičny nacyjanalizm pieražyvaje vidavočny kryzis. Ci jość tyja kropki skryžavańnia, ahulnyja padstavy, jakija mahli b abjadnać artadaksalny tradycyjanalizm i nacyjanalizm. Jany jość?
Svojeasablivaja prahramnaja zajava novych kryvičoŭ na błohu kryviec.livejournal.com patrapiła ŭ Top-30 zapisaŭ u błohach na Jandeksie. I vyklikała žyvuju dyskusiju.
Dziva što. Aŭtar piaje asannu aŭtarytaryzmu i raźvivaje adviazanyja ad realnaści manarchičnyja idei: «Pa vialikim rachunku, siońnia ŭžo stanovicca nie istotnym, ci zmahajemsia my za spadčynnuju manarchiju, ci za aŭtarytarnuju nacyjanalnuju dziaržavu. Možna i treba maryć pra ŭvaładarańnie Habsburhaŭ na vialikalitoŭskim pasadzie, možna spadziavacca, što biełaruskaja nacyjanalnaja dziaržava zmoža isnavać u aŭtarkii. Klučavym tut jość prablema pryncypu arhanizacyi ŭłady i ŭstalavańnie ijerarchii. Patreba ŭ charyzmatyčnym lidery budzie zaŭždy, niezaležna ad taho, ci budzie jon dynastam ci vychadcam z narodu».