Žanna Litvina admoviłasia ŭdzielničać u tok‑šoŭ na BT
Staršynia HA «BAŽ» admoviłasia ad udziełu ŭ teleprahramie Alaksandra Martynienki «Otvietnyj chod», što vychodzić u efir pa paniadziełkach na Pieršym nacyjanalnym kanale. «Prahrama nie praduhledžvaje tranślacyi ŭ pramym efiry».
Staršynia HA «BAŽ» admoviłasia ad udziełu ŭ teleprahramie Alaksandra Martynienki «Otvietnyj chod», što vychodzić u efir pa paniadziełkach na Pieršym nacyjanalnym kanale.
Zapis prahramy adbyŭsia 22 krasavika. Temaj razmovy było raźvićcio biełaruskaj infarmacyjnaj prastory.
U hutarcy z pres‑słužbaj BAŽ Žanna Litvina patłumačyła pryčynu svajho rašeńnia admovicca ad udziełu ŭ tok‑šoŭ:
«Prahrama nie praduhledžvaje tranślacyi ŭ pramym efiry. Heta aznačaje mahčymaść umiašalnictva ŭ vykazvańni jaje ŭdzielnikaŭ.Jašče horš, kali pry mantažy infarmacyju «adfiltrujuć«, vychapiŭšy asobnyja vykazvańni z kantekstu. Na žal, heta siońnia šyroka praktykujecca na našym telebačańni.
Ja nie chaču być saŭdzielnicaj niaščyraści i skažeńnia realijaŭ» .
«Liču, što moj šmathadovy dośvied pracy ŭ sistemie Biełteleradyjo daje mnie maralnaje prava admaŭlacca albo prymać zaprašeńni na ŭdzieł u takich prahramach. Na ščaście, ja zaśpieła časy roskvitu biełaruskaha telebačańnia i radyjo, časy pramych efiraŭ, kali hałoŭnym praviłam žurnalistaŭ było — danieści da aŭdytoryi kožnuju dumku svajho surazmoŭcy. Adnak siońnia ŭsio heta pierakreślena. Vyhladaje na toje, što našy kalehi źmirylisia z rolaj vykanaŭcaŭ ideałahičnaha zakazu.
Da taho ž, prablemy, ź jakimi sutykajucca niedziaržaŭnyja ŚMI, užo bolš čym paŭhoda nazad piśmova vykładzienyja i dasłanyja kiraŭnikam šerahu dziaržaŭnych orhanaŭ, ahučanyja ŭ prysutnaści pradstaŭnikoŭ Administracyi prezidenta, Ministerstva infarmacyi, padčas kruhłych stałoŭ — nie kažučy ŭžo pra staronki niedziaržaŭnaj presy i Interniet. Reakcyja na našy zvaroty — nulavaja, prablemy nie vyrašanyja, a tolki jašče bolš abvastrajucca. Ja maju na ŭvazie ŭ pieršuju čarhu novuju chvalu admovaŭ u raspaŭsiudzie niedziaržaŭnych haziet i ŭ akredytacyi žurnalistaŭ.
Na siońnia my nablizilisia da toj miažy, kali nam nieabchodna pryncypovaje refarmavańnie miedyjaśfiery.Zakanadaŭcam, ekśpiertam, usim zacikaŭlenym bakam varta sabracca na hramadskija słuchańni, vynikam jakich stali b kroki pa ŭrehulavańni stasunkaŭ ułady z presaj, vyznačeńnie roli i miesca ŚMI ŭ hramadstvie ŭ adpaviednaści z Kanstytucyjaj».