Łukašenka choča mieć «uzorna-pakazalnyja» adnosiny z Ukrainaj
Biełaruś i Ukraina majuć usie mahčymaści dla vychadu na jakasna novy ŭzrovień dvuchbakovych adnosin,
zajaviŭ Alaksandr Łukašenka 30 červienia na sustrečy sa staršynioj Viarchoŭnaj Rady Ukrainy Uładzimiram Litvinym, paviedamlaje pres-słužba prezidenta.
«Kali my realizujem uvieś kompleks damoŭlenaściaŭ prezidentaŭ i premjer-ministraŭ, paviercie, u nas budzie zusim inšaja architektura adnosin, adnosiny Biełarusi i Ukrainy nabuduć zusim inšuju jakaść, — skazaŭ Łukašenka. — My nie chočam mieć prablem z Ukrainaj. My chočam, kab u nas byli ŭzorna-pakazalnyja adnosiny, i my majem mahčymaść heta zrabić. Dzie treba pasunucca, my pasuniemsia, dzie treba pajści vam nasustrač, my pojdziem, ale heta nie budzie supiarečyć nacyjanalnym intaresam dźviuch dziaržaŭ».
Biełaruski kiraŭnik paviedamiŭ, što raniej u jaho adbyłasia sustreča z delehacyjaj Kanhresa ZŠA, padčas jakoj havorka išła i pra Ukrainu.
«Našy siabry prylacieli zdaloku, praz akijan, i ŭ ich było šmat da nas pytańniaŭ. Tak zdaryłasia, što tyja, chto byŭ nastrojeny suprać Biełarusi, apynulisia tut, i nam daviałosia ź imi doŭha havaryć. Darečy, skončyli razmovu Ukrainaj.
Apošnim časam Ukraina asabliva padtrymlivaje Biełaruś, i havorka z kiraŭnikom delehacyi taksama išła pra heta», — skazaŭ Łukašenka.
«My chočam, kab toj uzrovień, jaki zadali kiraŭniki dziaržaŭ, byŭ padtrymany», — zajaviŭ Uładzimir Litvin. Pavodle jaho mierkavańnia, Ukraina i Biełaruś «pavinny i buduć mieć budučyniu». Litvin zapeŭniŭ, što na svaim uzroŭni zrobić usio, kab usie damoŭlenaści byli realizavanyja.
Na sustrečy byŭ abmierkavany ŭvieś śpiektr adnosin Biełarusi i Ukrainy, havorka išła pra miesca i rolu dźviuch krain u jeŭrapiejskaj supolnaści. «Bieź Biełarusi i Ukrainy havaryć pra cełasnaść Jeŭropy i pra toje, što Jeŭropa moža vystupać hłabalnym hulcom, dačasna», — skazaŭ Litvin.
«Siońnia možna havaryć pra svajho rodu «darožnuju kartu» pamiž Biełaruśsiu i Ukrainaj, i rola parłamienta ŭ jaje realizacyi značnaja», — zajaviŭ Uładzimir Litvin. Pieradusim havorka idzie pra ekanamičnaje supracoŭnictva. Jak padkreśliŭ Litvin, Biełarusi i Ukrainie nieabchodna vykarystoŭvać svaje tranzitnyja mahčymaści i supracoŭničać u enierhietyčnaj śfiery, razhortvać adnosiny ŭ humanitarnaj śfiery, adukacyi, kultury, navucy.
Uładzimir Litvin padkreśliŭ, što ciapier nieabchodna nadać sistemnaść supracoŭnictvu. Heta adnosicca najpierš da mižparłamienckaha ŭzroŭniu. «My pavinny ad epizadyčnych sustreč pierajści da pastajannaj pracy», — skazaŭ śpikier Viarchoŭnaj Rady.